Minister y parlamentario ta debati otro basa riba cifranan ekiboca di turismo

ORANJESTAD – Mientras minister Otmar Oduber y parlamentario Dangui Oduber ta sigui debati cifranan di turismo, e biaha aki e compania internacional Bloomberg a haye ta rectifica cifranan cu segun e agencia mundial, ‘eroneamente a wordo publica’. Parlamentario (Dangui) Oduber a hala atencion di minister (Otmar) Oduber riba e publicacion aki, cu a sali publica den e medio internacional renombra. Pero rapidamente esaki a cambia ora cu e minister, a hala atencion di e gigante financiero. E ‘debate eterno’ ta relata na tildamento di otro di informacion eroneo riba estadistica di cifra turistico.

Tabata ora cu e matutino Bon Dia Aruba a publica cifranan di turismo crucero e fin di siman aki basa riba e publicacion, cu otro debate entre e dos Odubernan a cuminsa. Segun Oduber, ta trata di un fayo den calculacion cu a tuma lugar segun Bloomberg. “Ta cifranan cu Bloomberg ta haya for di APA (Aruba Ports Authority), y nos a tuma nota di un calculacion robes cu a tuma lugar” Oduber a bisa NoticiaCla.com dialuna mainta. E la tuma contacto cu APA y ATA, cu a manda notifica Bloomberg mesora, cu na su turno, a coregi e informacion aki. Segun Oduber, ta ‘duidelijk un fout den conteo’ cu Bloomberg a haci’.

Mientrastanto, e parlamentario Oduber a cuminsa tilda e minister di ta gaba september como e miho luna di e ultimo 10 añanan den e mundo crucero. “Berdad ta cu e stayover, e stayover a crece cu 16.4%” Oduber ta admiti. Mes momento e ta admiti cu turismo crucero tambe a crece den september 2014 cu 24.2% , cu ta 5000 pasahero. Loke segun Oduber no a menciona, ta cu e caida di turismo crucero di e prome 9 lunanan di anja 2014. Aki e ta referi na e informacion di e.o. Bloomberg. “Segun un website na New York, Bloomberg.com nos ta haya informacion cu turismo crucero a cay drasticamente den e prome lunanan di aña” Oduber ta sigui bisa. Aki e ta puntra su mes, dicon parlamento no ta haya e informacion aki, mientras cu e website na New York , parlamentario Dangui Oduber tin cu haya e informacion. Mientrastanto, e coreccion ta haci, y den e caso aki, Oduber (minister) a ‘gana’ e ronda aki di Oduber, e parlamentario.