Aki tres siman Aruba ta tende si e ta riba blacklist di OECD

ORANJESTAD – Aki tres siman Aruba ta haya sa si el a scapa di ta riba e ‘black list’ di Organization of Economic Cooperation and Development (OECD) of no, y asina evita cu inversionistanan ta stop di inverti riba Aruba. Asina prome minister Evelyn Wever a clarifica pa NoticiaCla diahuebs mainta durante un conferencia di prensa. Segun Wever, minister di finanzas Xiomara Ruiz a haci su presentacion dialuna na Paris durante e reunion di OECD, pa purba convence OECD cu gobierno di Aruba lo elimina e ley local (Aruba) Vrijgestelde Vennootschap (AVV)  y asina cumpli cu OECD. OECD tin problema cu e ley aki y ta considere un forma pa haci negoshi no corecto debi na su practica particular fiscal. Aki tres siman ora cu e rapport di OECD sali di e reunion, Aruba lo haya sa si e presentacion di Ruiz tabata satisfecho. 

KICO A SOSODE 

Segun Wever, e AVV a duna Aruba hopi dolor di cabez for di su introduccion na anjanan 80. E tabata un ley popular fiscal cu ta beneficia hopi compania y e tempo ey mester a atrae companianan y a usa e AVV como un forma pa logra esaki. Wever a bisa cu tin un bon sentiment cu tur cos lo bay bon y cu Aruba no ta wordo ‘castiga’ di e caso aki. Wever a sigui mustra cu ta e gobierno anterior no a cumpli cu e promesa haci na OECD pa elimina e ley fiscal aki, cu awor Aruba ta haye den un problema di ‘ultimo ora’. Segun Wever, Ruiz a priminti OECD cu prome cu fin di e aña aki, lo elimina e ley aki. Dado caso OECD resulta cu OECD no a keda convenci pa Ruiz su splicacion, y ta pone Aruba toch riba blacklist, gobierno lo tin cu pasa e ley mesora y mustra OECD cu nan ta serio cu nan promesanan. 

RUSH

NoticiaCla a puntra Wever riba e asunto, unda cu a pidi claridad pakico e urgencia pa minister Ruiz tambe ta presente ya cu e reunion tabata uno planea caba pa bay Paris, pero solamente hefenan di departamentonan di gobierno riba cierto tereno y no minister. Pero 5 dia prome cu e reunion tuma lugar, a bin compronde di OECD cu e dia ey, lo a trata e caso di Aruba su ‘falta di cumplimento’ pa cu e eliminacion di e ley di AVV. 

KICO TA UN AVV

Manera indica, un AVV ta un Aruba Vrijgestelde Vennootschap cu ta un structura fiscal cu ta beneficia companianan pero tin practica dudoso. Un AVV ta un termino fiscal cu ta cumpli cu cierto condicionan, cu ta e.o. libera e compania di paga winst belasting riba su entrada fiscal. E tin cu haci ‘aangifte’ si di su winstbelasting. E ta un asosacion popular pa structuranan local cu ta beneficia e compania den varios forma fiscal cu ta libera e compania di paga cierto impuesto. NOTA; E potret ta uno di archivo di un reunion di OECD di 2016.