Gobierno a firma MOU pa ofrece pasadia pa esnan cu limite mental

ORANJESTAD - Gobierno a  firma MOU pa ofrece pasadia pa esnan cu limite mental. Den cuadro di e crisis plan social, Minister di Salubridad Publico, Sr. Dangui Oduber y Minister di Asunto Social, Sr. Glenbert Croes, a firma e MoU cu partnernan relevante. E MoU aki ta pa ofrece un pasadia y un cantidad di 20 cama pa esnan cu limitacion mental, en particular mucha y hoben, cu ta rekeri cuido intensivo 24 ora. 

Originalmente a diseña y construi e facilidad aki di pasadia y e tres unidadnan di cuido localisa na Centro di Cuido San Nicolas netamente pa e grupo aki. Desafortunadamente e Centro di Cuido aki a keda mas cu 8 aña sin ser ocupa. 8 aña largo e lugar aki a keda bashi. Ambos mandatario a accentua e importancia di percura pa e grupo aki haya un calidad di bida cu ta un encera miho cuido y proteccion. E partnernan cu a colabora pa haci esaki posibel na Centro di Cuido San Nicolas na Palisiaweg ta: SABA, Fundacion Ambiente Feliz, SVGA, Cede Aruba, Departamento di Salubridad Publico y Departamento di Asunto Social.