Cruz Cora Aruba a prepara nos Grandinan pa temporada di horcan

ORANJESTAD- Diaranzon, 12 di september e grupo “Het Witte Licht” di Cruz Cora Aruba a organiza un encuentro masha informativo pa nos grandinan. Cruz Cora Aruba a cuminsa cu e proyecto aki na 2012 cu un grupo di 40 persona riba 65 aña. E grupo ta bin hunto algun biaha pa aña pa pasa un mainta of atardi gezellig pero na mes momento pa haña informacion valioso, ya cu nan ta biba na cas y mester yuda nan mes.

Un di e metanan di Cruz Cora den reino, ta pa promove y motiva “zelfredzaamheid” e confianza pa por actua independiente y tambe conciente specialmente den caso di nos grandinan. Y esaki ta e meta di “Het Witte Licht”. Durante añanan a bin cu topiconan manera: uso responsabel  di remedi, diabetes, prevencion di candela y hopi mas. Awe a topico tabata “Con pa prepara pa horcan” cu a wordo presenta pa Humphrey Blinker, colega di Suriname Rode Kruis, cu ta na Aruba e siman aki pa duna training di “Vulnerability Capacity Assessment” na voluntarionan di Cruz Cora Aruba. E grandinan awor ta prepara y tin nan checklist na cas y lo por sa kiko tur mester tene cuenta cu ne.