SAC lo demanda gobierno si nenga permiso di carnaval

ORANJESTAD – Si Stichting Arubaanse Carnaval (SAC) no haya e permiso pa organisa carnaval, e ta hiba gobierno (di Aruba) corte. Esaki tabata declaracion di abogado di SAC, Darrin Crouch na NoticiaCla.com recientemente. Segun Crouch, SAC a entrega e peticion di permiso for di 1 di september, y ta wardando e resultado di esaki. Segun Crouch, e motibo di bay corte ta pasobra nan kier mira kico e motibonan ta pa nenga e permiso, despues di tanto aña di a organisa carnaval den un forma responsabel.

E combersacion tabata prome cu e reunion entre SAC y gobierno a tuma lugar siman pasa y dialuna, unda cu a bin dicidi cu SAC no ta forma parti mas di e organisacion nobo cu tin cu wordo lanta aworaki. NoticiaCla.com a puntra e abogado na tal occasion, con a para cu e asunto di hiba gobierno corte. E ora Crouch a splica cu e motibo pa bay corte, lo ta si SAC no haya e permiso.

NoticiaCla.com a confronta e mandatario di Cultura cu esaki, y e mandatario (Otmar Oduber) a lamenta e pensamento aki. “Si nan dicidi di bay corte, lo tin cu bay Corte. Naturalmente gobierno di su banda lo bay mustra kico e consecuencianan lo bay ta, cu si SAC sigui organisa carnaval” Oduber a bisa NoticiaCla.com. Segun e mandatario, e bienestar cultural di pais Aruba, no ta duna espacio pa bay kibra un di e eventonan di mas grandi cu tabatin. “Si nos no a intermedia, lo a nifica cu lo tin carnaval cu 2 grupo y nos no sa si lo bay tin musico cu lo bay sostene” Oduber a sigui bisa. “Si hues bolter e asunto (esta laga SAC gana), nos mester sigui y obedece loke hues bisa. Pero e ora nos sa kico ta bay pasa. Un carnaval cu 2 grupo y no tin calypso cu roadmarch (contest).