Corte ta trata e caso di asesinato na de Vuyst (Fist) diabierna

ORANJESTAD - Diabierna mainta awor Corte ta trata e caso Fist (asesinato na de Vuyst). Ta trata di e caso unda cu un homber a mata un dama y horta placa. E caso a hala hopi atencion debi na e forma con e crimen a tuma lugar. E sospechoso J. Chaljub na juni a opta pa no papia durante e tratamento pro forma.  

PRO FORMA DEFENSA

Na juni ora cu e caso a tuma lugar pro forma, di parti di defensa, abogado Damian Illis a pidi huez pa scucha 3 testigo, entre nan e pareha A. Vrolijk y R. Yarzagaray cu lo tin cu establece e ‘alibi’ di su cliente J. Chaljub. Ademas a pidi pa un biaha scucha ruman di e defunto Sarahi Sierra, esta S. Sierra pasobra ‘falta algun pregunta cu no a haci ainda.

CORTE

Huez a bay di acuerdo cu tur e peticionnan y a pone e fecha di 14 di September 2018 pa 9’or di mainta, unda cu e caso lo wordo trata integralmente. Huez a puntra si tabatin demanda cu famianan di e victima kier a haci. Den e caso aki, e mama a reaccionando pasobra ‘e no ta trece mi yiu bek’, indicando cu e no ta interesa den material, sino husticia pa su yiu muher.

CARGO OFICIAL

E cargo oficial contra Chaljub ta entre otro acusa di a intencionalmente tuma bida di un persona riba 3 di november 2017, dor di chokele, stik e, hinke cu un obheto skerpi y/of dal e cu un obheto stompi. E homicidio a wordo precede pa violacion di e persona, secuestro y/of ladronicia di un suma di placa.

E CASO

E caso a keda raporta dia 3 di November 2018, unda cu ruman di e defunto a haya e victima, Sarahi Sierra (19) den un camber di e cas na de Vuyst, sin bida. E melding a drenta 1.45 di merdia. E forma den cual a haya e victima, tabata cruel. Despues algun luna di investigacion, a bin detene e sospechoso Chaljub, cu a resulta di ta un conoci di e famia, cu a causa aun mas dolor den e famia. Despues a detene e ruman muher di e victima, S.Sierra unda cu tabatin sospecho cu e tabata na altura di e parti di e robo. Pero despues di algun dia, a laga e ruman muher liber atrobe, pendiente e caso. Chaljub ta wordo acusa di a intencionalmente tuma bida di un persona riba 3 di november 2017, dor di chokele, stik e, hinke cu un obheto skerpi y/of dal e cu un obheto stompi. E homicidio a wordo precede pa violacion di e persona, secuestro y/of ladronicia di un suma di placa.