DRH: Total di 55 ambtenaar a haci peticion pa bay cu VUT

ORANJESTAD - Un total di 55 ambtenaar (trahado di gobierno) a haci peticion pa bay cu VUT ( Vervroegde UitTreding osea retiro boluntario tempran) desde cu gobierno a anuncia esaki recientemente. Asina hefe di Departamento di Recurso Humano Omayra Lares a bisa den un conferencia di prensa. E intencion ta pa asina gobierno logra reduci e cantidad di personal y gastonan di esaki, conforme areglo cu Hulanda. Tin dos siman di tempo ainda pa esnan interesa pa bay cu VUT, haci e peticion na e departamento concerni (e fecha final ta 28 di september 2018). 

KEN POR HAYA VUT

Haci un peticion, no ta nifica cu e persona ta haya e retiro automaticamente, sino ta depende di un comision cu ta aproba esaki. A haci mencion di casonan cu a wordo rechasa, manera algun persona cu ta den un funcion importante cu gobierno mester di dje ainda, y casonan di hende cu tin un problema cu DRH y ta pendiente cu p.e. corte. For di 2014 cu gobierno a reintroduci VUT, un total di 280 a haci uso di e areglo aki. 

E AREGLO

E areglo, unabez cu gobierno aproba e ambtenaar pa haya VUT, ta nifica cu e por retira di trabou, sea pasobra el a cansa, fada of kier cuminsa su pensioen trempan. Unabez cu un persona haya e VUT, e ta haya un recompensa financiero cu ta core 3 aña. E prome aña di VUT, e persona ta haya 90% di su salario paga, sigui pa 80% e di dos aña y finalmente 70% e ultimo di tres aña. Potret cortesia 24ora.com