Timmermans: No tin obstaculo pa Insel Air bula directo Aruba-Surnam

DEN HAAG – “No tin ningun obstaculo pa laga Insel Air bula directo entre Aruba y Surnam”. Esaki ta contesta di minister di asuntonan exterior hulandes Frans Timmermans como contesta na parlamentario hulandes Bashir (SP) recientemente. E parlamentario a haci un serie di pregunta na e mandatario relaciona cu e problema cu lo tabatin entre Aruba y Surnam, rond di e aspecto di Insel Air Aruba. “No ta berdad cu Hulanda a laga sa na Surnam cu no tin interes pa un areglo completo di ‘open sky’ cu Surnam” segun Timmermans”. Segun e mandatario, e regimen di aviacion actual entre Hulanda y Surnam ta cumpli (te cu awor) cu satisfaccion.(lesa e carta completo aki)

“Pa Hulanda no tin necesidad pa adapta e acuerdonan actual cu Surnam, pasobra den e situacion actual tin espacio pa dos aerolinea adicional por opera bou di e tratado aki” Timmermans ta clarifica. Esey ta implica cu tin espacio tambe pa Insel Air Aruba. Sinembargo esaki no ta afecta, manera a wordo stipula na 2013, cu tin e posibilidad pa papia cu Surnam riba mas liberalizacion, si ta necesario. “Surnam no a atende e asunto aki cu Hulanda te awor” e mandatario a sigui bisa.

Mes momento Timmermans ta clarifica cu e acuerdo actual di aviacion entre Hulanda y Surnam, ta separa di e relacion entre Aruba y Surnam y/of Surnam cu Corsou. “E relacion di aviacion bilateral cu otro paisnan ta un asunto interno di e paisnan autonomo dentro di Reino Hulandes” Timmermans a sigui bisa.

Contestando e pregunta di e parlamentario, riba e posibel confusion cu por a wordo crea den un articulo den e corant surnameno ‘De Ware Tijd’, Timmermans ta clarifica cu e crea e impresion eroneo den e articulo cu e open sky entre Aruba y Surnam of Corsou y Surnam, ta pendiente e relacion aereo entre Hulanda y Surnam. “Esey no ta e caso. Paisnan den Reino hulandes ta atende nan propio asunto di maneho di aviacion”.

Specificamente riba e problema di Insel Air, Timmermans ta bisa cu ‘ no tin ningun obstaculo pa laga Insel Air bula directo entre Aruba y Surnam. Esaki pasobra e acuerdonan ta ‘separa’ di e relacion di aviacion entre Hulanda y Surnam.’ Ademas, e relacion di aviacion entre Aruba y Surnam of Corsou/Surnam ta un asunto interno.