InselAir ta na bida ainda pasobra tin compania interesa den dje

WILLEMSTAD – Ta debi cu InselAir ta keda eligible pa un asina yama ‘take over’ pa un otro compania, (tin 2 compania interesa), e curator encarga cu e compania, a sugeri recientemente na e grupo di creditornan di e aerolinea, pa extende e bida di InselAir un poco mas largo. Asina un carta ,- cu ta den poder di NoticiaCla-,  di e curator ta bisa. E reunion di dia 31 di augustus ultimo, a resulta den extension di bida di e aerolinea pa un aña y mei mas pero condiciona. Y e condicion ta cu na dos occasion proximo (30 di October y si ta necesario 4 di december proximo). Si durante un di e dos reunionnan aki resulta cu toch no por keda cla cu e situacion financiero, ta duna huez e opcion pa declara e aerolinea bancarota ainda. 

SITUACION FINANCIERO

Durante e reunion reciente, a establece cu e situacion financiero di e aerolinea lamentablemente no a mehora. “No obstante e varios medida cu gerencia di e aerolinea a tuma, (manera retiro di varios trahado y reduccion di e operacion) e compania ainda no ta completamente capaz pa cumpli cu su obligacionnan actual.

TAKE OVER

No obstante esaki, InselaAir ta keda eligible pa un otro compania tuma esaki over. Y segun e curator a informa durante e reunion, tin dos compania cu ta interesa pa esaki. Basa riba e detaye ey, e curator a conseha e creditornan pa vota pa un extension di e moratorium, osea e surseance van betaling. Segun e curator, un toma di un otro compania, lo ta e miho scenario pa e creditornan, compara cu bancarota cu lo nifica cu e creditornan lo perde tur nan placa y cualkier otro claim cu tin. Cu esaki, mayoria di e creditornan a opta pa extende e moratorium.

CONDICION

E condicion mara na e decision aki, ta cu InselAir cumpli cu tur su obligacionnan actual, incluyendo su obligacion di impuesto entrante 1 di September 2018, y cu InselAir elimina tur e debenan acumula desde comienzo di e moratorium (sea pa medio di pago of pa cancelacion di e creditornan relevante). E huez a ordena ademas cu pa dia 30 di October e curator presenta un rapport publico cu e informacion di cumplimento di InselAir , y cu e curator informa e huez si den un fase mas tempran cu e tempo di extension, InselAir no por cumpli cu e condicionnan stipula pa e huez. Den e caso ey, e huez lo dicidi e momento ey si e ta ordena bancarota di e aerolinea. Un di dos rapport mester wordo entrega dia 4 di december di e aña aki, si e moratorium no a termina pa e fecha ey. E momento ey mester ta cla si tin un deal cla pa tuma InselAir over, y cu esaki ta encera cu InselAir lo ta capaz pa ofrece su creditornan nan placa. Mes momento e curator no a sigura cu e creditornan por spera nan pago (of parti di esaki). A priminti di lo sigui traha pa restructura e aerolinea di tal forma cu e ta na interes di e creditornan. Por lesa e carta completo AKI.