Gradualmente lo destina por lo menos 6% di GDP na educacion

ORANJESTAD – Gobierno gradualmente lo destina por lo menos 6% di su GDP na educacion. Asina e ta ilustra den discurso di Gobernador na occasion di apertura di aña parlamentario. Manera ta conoci, e discurso ta ilustra e plannan cu e gobierno na mando tin pa e proximo termino. Y un di e puntonan cu a resalta, ta e aspecto di educacion.

EDUCACION DESPUES DI ORARIO DI SCOL

Gobierno ta splica cu lo tin atencion special tambe pa educacion despues di oranan di scol, unda cu nos mucha- y hobennan por desaroya nan personalidad pa medio di deporte, arte, musica y otro guia profesional. Lo revitaliza Instituto Pedagogico Arubano, unda nos futuro maestronan ta wordo forma y lo continua pa logra un cooperacion optimal entre IPA y Universidad di Aruba.

CALIDAD DI EDUCACION

Calidad di educacion no ta posibel sin un infrastructura adecua. Gobierno a mustra cu e construccion di e prome “Smart school” ta na caminda y tambe e digitalisacion di educacion. Pa por midi e calidad den nos enseñansa ta bay implementa den e tres aña nos dilanti un sistema di colecta data di Enseñansa moderno cu sosten di UNESCO, cu ta yama Educational Management Information System.

PLAN NACIONAL DI EDUCACION

Un Plan Nacional di Educacion 2018-2030 lo cana hunto cu e 17 metanan di desaroyo sostenible pa 2030. E Plan Nacional aki ta sigui riba e principio di UNESCO cu un educacion mester ta basa riba e idioma materno. Gradualmente nos lo cumpli cu e norma di UNESCO pa destina por lo menos 6% di nos GDP na educacion. Asina Gobernador a describi parti di e plan di enseñansa di gobierno pa e proximo aña gubernamental.