Gobernador: Gobierno ta pone e cuadro pero no por haci tur cos su so

ORANJESTAD – “Gobierno ta pone e cuadro pero no por haci tur cos su so. E ta un responsabilidad comparti tur actornan envolvi. Y e ta rekeri pa tuma decision cu no ta facil. Pero si tuma corahe pa haci esaki, nos lo wak cu nos ta logra sali for di e desafionan cu tin”. Na palabra, Gobernador di Aruba, Su excelencia Alfonso Boekhoudt awe mainta na ocasion di apertura di aña parlamentario number 33 di pais Aruba.  E mensahe general den e discurso tabata cu nos por carga speranza pa un miho mayan, door cu awe a tuma e decisionnan necesario. Historia a demonstra cu practica ta mustra si cu ta e ehecucion debido di e decisionnan ta bira determinante.    

DISCURSO DIFERENTE

E discurso tabata uno diferente cu añanan anterior, den sentido cu e no tabata un propaganda politico unda cu e gobierno na mando ta bende su mes cu logronan. Notable ta e hecho cu no a enfoca demasiado riba e aspecto di crisis, evitando di duna e discurso un tono negativo'. Otro punto tambe tabata cu a pone ma enfasis riba ‘kico lo bay bin ainda, y menos riba tur loke a wordo haci caba’.  E discurso generalmente ta un producto di gobierno, unda cu aki aya, Gobernador tin e libertad pa haci algun toke. Pero ta gobierno (lesa: prome minister) tin e decision final den sentido cu e ta carga e responsabilidad politico pa e contenido di e discurso.

SIMBOLISMO DI NOS BANDERA

E discurso a basa su mes riba e simbolismo di Aruba su bandera, y usando e caracteristicanan di e bandera, pa refleha cierto aspectonan di pais Aruba cu ne. Den esaki a usa e color blanco, blauw, cora y e puntonan di e strea di e bandera, pa describi e situacion di nos pais Aruba. P.e. e blanco cu ta refleha e santo blanco, tambe aki mester a refleha e ‘pureza di curazon’ y e forma con nos ta ‘respeta husticia, orden y libertad’. E blauw a para pa e laman, pero tambe e entrada pa describi nos situacion di naturalesa y e esfuerso pa cu su proteccion. E geel a tipifica abundancia, y cu esaki ta ‘e raiz di bon maneho di finanzas publico’. E color cora a tipifica e cariño di e isla, y mes momento e ‘industria di antaño’, y a sigui asina pa describi e industria cu Venezuela y tur su problemanan cu tin rond di esaki. Y finalmente e puntanan di e strea, cu ta sirbi como compas di nos hende y direccion. Lesa e discurso completo AKI.