Meteo: Nos lo scapa di biento di Isaac pero no awacero

ORANJESTAD - Servicio di tempo di Aruba a duna un informacion mas actualisa riba e situation di horcan Isaac. Segun Meteo, na e momentonan aki nos ta enfrentando Isaac, cu ta un menasa pa area di Caribe. Sinembargo, segun tur e pronosticonan, Isaac ta bai pasa na un distancia basta safe (350 pa 400 km) Noord di Aruba. “ Esaki ke men cu nos lo no bai haña biento duro di Isaac, kisas algo di weer, awacero, strena cu lamper, i lama cu lo bai bira bruto pa un periodo di tempo no defini ahinda; esaki, debi cu Isaac ta poco leu ahinda pa bisa cu claridad kiko ta bai pasa exactamente” ta e mensahe di Meteo. Pa e motibo aki Meteo ta pidi un i tur pa keda pendiente di e boletinan di tempo cu Departamento Meteorologico di Aruba lo emiti pa asina keda informa di e situacion.

INFLUENCIA DI TEMPO

Pa loke ta trata influencia di sistemanan tropical riba e clima di tur dia, esaki por varia debi na diferente motibo: kon leu e sistema ta pasa, si e ta causa awacero of no, con fuerte e ta, kiko e ta hasi cu e biento den bo region. Sistemanan tropical por causa awacero, hopi biento,  lama bruto; afortunadamente e influencia aki riba e clima normal no ta duro hopi; un paar di dia kisas, despues tur cos ta normalisa.