Gobierno di Aruba cu reunion urgente diasabra riba tema di asilo politico

ORANJESTAD - Gobierno a aclarea e situacion di dunamento di asilo politico diasabra atardi laat, debi na hopi rumor y informacion incorecto riba caya, cu lo a duna un grupo di Venezolano asilo politico. "Gobierno di Aruba no a duna ni un persona asilo politico" Evelyn Wever Croes a bisa durante un mensahe en vivo transmiti via e.o. facebook diasabra anochi despues di e reunion extraordinario cu varios departamento concerni. Segun Wever, tabata necesario pa yama e reunion ey cu e fin pa establece trankilidad bek den comunidad. E hecho cu tanto personanan di UNHCR (Departamento di Nacionan Uni) y Cruz Cora lo ta dunando hende formulario pa asilo politico, lo a crea e 'panico' den comunidad. Wever a confirma cu e instancianan aki a duna formulario, pero cu nan no ta e autoridad pa extende e asilo politico. Como tal a splica cu no ta pasobra bo a yena e formulario, cu esey ta nifica cu bo a haya asilo politico. E unico cu por duna asilo politico na Aruba ta gobierno, segun Wever, y no e dos instancianan menciona. A compronde cu hendenan ta pensando cu door cu nan a yena e formulario, cu nan lo a haya e asilo, of cu nan ta 'protehi' y te hasta por traha, mientras ta en espera di un asilo politico. 

ASILO POLITICO

Un biaha mas Wever a splica kico e procedura ta pa haya asilo politico. A mustra cu pa un persona haya asilo politico, e mester cuminsa na pidi esaki asina cu e drenta e pais cu e kier e asilo politico. Den e caso aki, un persona cu bin di Venezuela, ora cu e drenta Aruba e mester pidi autoridad di Aruba, y no Cruz Cora of UNHCR pa esaki. Y e motibo pa pidi asilo politico ta pasobra bo ta teme pa bo bida, si bo keda na e pais di origen, cu den e caso aki ta Venezuela. A splica cu esey kier men tambe cu bo no por ta p.e. bibando na Aruba pa un aña of mas y despues dicidi cu bo ta pidi asilo politico. E mandatario ta spera cu e splicacion di diasabra, cu por reina trankilidad riba e tema aki. Por mira e video di e conferencia AKI.