Veterinario ta lamenta caso di cacho cu a muri den afmaakhok

ORANJESTAD - Veterinario propietario di Animal Care Clinic, Natalie Booi ta preocupa cu e loke a sosode recientemente cu un caso di un cacho mascota cu a muri, despues cu un polis a hib’e afmaakhok (kill cage). E caso ta di siman pasa ora cu e cacho mascota di un persona,  pa un descuido a sali di cura y a bay un otro caminda. Eynan e doñonan di e lugar a yama e.o.  polis cu a bin y unda un di nan a hiba e cacho e afmaakhok unda cu a pone e cacho drumi. Booi ta cuestiona e forma con esaki a sosode na e afmaakhok y ta spera cu por remedia e situacion pa futuro. 

E CACHO

E problema ta cu den e caso aki ta trata di un cacho, un cliente di e veterinario cu ta cumple cu tur rekisito pa ta un bon cacho, den sentido cu e tin tur vacuna, tratamento, su chip. Ora cu un cacho wordo laga na e afmaakhok, esnan di servicio veterinario mester check si e cacho of pushi laga, tin un chip prome cu nan pone drumi. Den e caso aki segun Booi, esey no a sosode y ta aki ta cuestiona e asunto aki. 

POLIS

Booi a menciona si cu hopi otro polis si ta tuma e tempo pa bienestar di e bestianan, y ta lamentable cu ta aki algo a bay malo, net cu un polis. Segun Booi, hopi biaha ta polis ta contacta cu e veterinarionan pa asunto di cacho. Por ta ta trata di cachonan accidenta pa auto, of cachonan neglisha sin doño. “Tin hopi polis ta cu haci nan best pa preveni e sufrimento di e bestianan” Booi a bisa. E no sa cua polis tabata envolvi den e caso aki specificamente. 

DOÑO

Mientrastanto e doño di e cacho Bamboe, Merlijn van Lelyveld, a splica NoticiaCla cu informacion cu e tin, ta cu e polis en cuestion lo a yama animal shelter unda cu nan a bisa cu nan no ta tuma mas cacho y cu mester lage na afmaakhok. “E polis no tabata sa di unda e cacho a bin, y si e tabata un cacho di caya of no. Hopi ‘jammer’ cu esaki a termina asina’ van Lelyveld a bisa NoticiaCla.