Booi: Mester drecha y regla e asunto di ‘afmaakhok’ miho na Wayaca

ORANJESTAD - E situacion di e asina yama ‘afmaakhok’ patras di Animal Shelter na Wayaca mester cambia.  Asina veterinario, propietario di Animal Care Clinic esta Natalie Booi ta bisa NoticiaCla. E asunto di laga bestia na e sitio aki, un biaha mas ta den noticia despues di e caso tragico di e cacho mascota ‘Bamboe’ a bira noticia. Door di no a atende cu e asunto corecto, e cacho a wordo poni drumi 'inocentemente'.  E problema di e lugar segun Booi, ta e lugar su condicion, e reglanan con ta anda cu e proceso, y si ta sigui nan of no. Y Booi ta dispuesto pa aporta pa mejora e situación aki. 

SITUACION

E afmaakhok of 'kill cage' ta existi pa hopi aña caba unda cu hende por laga nan bestia ‘indesea’ eynan, cu despues ta wordo ‘poni drumi’ pa servicio veterinario un dia despues (si ta den siman). Segun Booi, lamentablemente un sitio asina ta existi pa motivo cu nos sistema di cuida bestia na Aruba y e asunto di ta responsabel pa bestia, no ta mucho bon. Como tal e afmaakhok ta bira un alternativa. Nada malo cu e hoki aki, pero ta e condicion di e lugar, y e regalan cu no ta wordo aplica, ta loke ta molestia Booi. 

CONFUSION

Pa cuminsa, e ubicación ta hopi confuso pa hende. Pa esnan cu no sa, e afmaakhok ta situa net patras di e Animal Shelter (na Wayaca), cu ta pone cu hopi hende ta confundi esey cu e shelter, keriendo cu ta na e shelter nan a hiba e bestia. Ta hendenan cu no por deal cu nan bestia mas, of cu ta haya un bestia riba caya y no kier pa e sufri of haya un cas ‘temporal’, ta hiba nan eynan. Tur dia den siman, entre 10’or y mei y 11’or, servicio veterinario ta bin y ta pone tur e bestianan laga den e afmaakhok, drumi. Problema segun Booi, ta cu e lugar no ta bon ubica, no tin un aviso cla cu ta bisa kico e lugar ta, y con e ta opera. Booi ta splica como ehempel, cu si un persona laga un cacho eynan diabierna, ta te dialuna mainta e bestia ta wordo poni drumi. Mientrastanto su ultimo dos dianan di bida, e ta pasa den solo (no tin afdak), sin awa etc, pues esey no ta corecto. Ademas tin pensamento cu e departamento cu tin cu pone nan drumi, no tur ora ta controlando e bestianan pa chip, siendo cu for di momento cu e campaña ‘Stimami Sterilisami’ a cuminsa, nan a haya un chip reader cu por lesa tur chip den e bestianan. Esaki ta identifica e bestia cu un number, cu ta registra na un veterinario na Aruba. Esey ta evita cu ta pone un cacho drumi, cu tin doño y cu porta por a scapa di cas pa accidente. Si a haci e trabou corecto, awe 'Bamboe', lo no a fayece.

OFERTA

Booi a splica e portal aki, cu el a ofrece na e director nobo di servicio veterinario pa aporta pa mehora e situacion eynan. “Mi ta willing pa paga un hende pa traha un afdak, pa dal un pinta, pa zorg pa tin un forma cu e bestianan por haya awa, cuminda, y traha haula drechi” Booi a bisa. E ta bisa esaki pasobra ta duna como ehempel cu kico lo pasa si un famia trece un neshi di pushi, y un ora después un otro hende ta dump un pitbull eyden. “Ta cosnan cu ta pasa. Nan (servicio veterinario) ta bin haya e siguiente dia un masacre. E cos ey no por” Booi a bisa. Y asina tin mas cos cu mester pa por drecha e situacion. Booi no kier culpa ningún hende, pero e ta sintió cu mester haci algo miho.