Oduber: Didder mes a tuma retiro temporal di partido POR

ORANJESTAD - Lider di partido POR Otmar Oduber a desmenti tur e cargonan cu miembro di partido Robin Ann Didder ta acusa di dje pa cual como miembro di management team di Serlimar a keda suspendi diahuebs atardi. Entre e acusacionan falso, ta cu e lo a priviligia famia cu contract y duna cierto salario na cierto personanan. Durante un conferencia di prensa diabierna mainta, Oduber a confirma e suspension si, pero cu e acusacion contra dje cu tabata circula den media, no ta berdad. Manera NoticiaCla a raporta diahuebs anochi, Didder a keda suspendi pa un periodo no conoci como miembro di e management team. Ademas Oduber a confirma diabierna mainta cu ta Didder mes a tuma distancia temporal di e partido, pendiente e investigacion. "E ta keda inocente te ora cu e investigacion termina" Oduber a bisa di loke cu Raad van Toezicht a bise diahuebs. Tin algun punto cu a bin dilanti pa loke ta maneho di Serlimar pa cual e ta wordo investiga. Oduber a confirma si, cu e asunto ta haci dolor den e partido, pero mes momento ta mustra cu e partido ta para pa integridad. 

ALAN HOWELL

Mes momento Oduber a bisa cu ningun momento, contrario di informacionan suministra di otro medio, miembro di partido y parlamentario Alan Howell ta involucra den e caso aki di Serlimar. "Su persona no tin nada di haber cu e desicion cu a wordo tuma. No tin nada envolvimento (di Alan Howell)" Oduber a bisa. Riba pregunta di pakico ta usa Howell, Oduber a bisa cu no tin ningun informacion. E forma con segun Oduber, informacion a sali, ta mustra e tactica di no pone nomber bou di e articulo of mensahe y ta 'share' esaki den un forma di un 'broadcast'. Esey ta hacie dificil pa demanda un persona pa difamacion pasobra no por prueba ken a hacie, aunke e mandatario tin un idea di cua 'skina' e noticia aki ta sali.