Minister di Labor ta desmenti cu e lo honra ontheffing di ex minister Croes

ORANJESTAD – Minister di Labor Glenbert Croes diahuebs mainta a desmenti e noticia di e portal Awe Mainta di diahuebs mainta,  cu ' e lo honra e ontheffingnan firma pa ex minister Paul Croes'. Segun (Glenbert) Croes, ora bo ta traha duro e tropiesonan cu opositornan corupto kier pone den bo caminda ta hopi. “Pero ora bo ta traha cu honra niun flie di noticia falso lo coy biento”. “Pues, e noticia di Toko y Awe Mainta y AVP ta falso” Croes a bisa.

MANAGEMENT TEAM

(Glenbert) Croes a recorda cu pa logra ‘elimina e fenomeno corupto di ontheffing’, el a institui cu Team di Maneho nobo na DPL. Mientras tanto su maneho riba tereno laboral tambe ta cla y ta den pleno ehecucion. “E cambionan aki a trece resistencia cu ne den e propio DPL unda e grupito cu tambe a haci fiesta hunto cu AVP, a cuminsa boycotea e maneho di e mandatario. E boycot aki a culmina recientemente cu un 'broadcast' completamente falso y un articulo den e corant Awe Mainta completamente falso” Croes a sigui bisa.

INVESTIGACION

Segun minister (Glenbert) Croes, e Team di Maneho di DPL ta haciendo su propio investigacion di unda informacion ta sali for di DPL. Na bureau di Minister ya nos tin nomber y fam. "Nos ta laga e investigacion sigui su caminda pa despues nos tuma e pasonan necesario", Glenbert Croes a declara.

TRANSPARENCIA 

Segun (Glenbert) Croes, un Mandatario ta honra transparencia cu no ta tolera ningun acto di corupcion. “Y e grupito hunto cu nan partido y nan medianan cumpra por purba di boycotea su maneho recto y corecto, pero Aruba ta na prome luga den e Gobierno aki. Y si un empleado publico cu mester ta sirbidor di pueblo no por ta corecto den su trabou, no por ta parti di e Ministerio aki” Croes a sigui bisa.