Ruiz: Presupuesto 2019 lo por keda entrega pa fin di september

Ruiz: Presupuesto 2019 lo por keda entrega pa fin di september

Posted on 09/6/2018 5:05 pm AST | Updated on 09/6/2018 5:16 pm AST

ORANJESTAD – Pa fin di luna mas tarda gabinete Wever Croes por entrega e presupuesto 2019 di pais Aruba na Parlamento. Asina minister di finanza Xiomara Ruiz Maduro a bisa NoticiaCla diahuebs merdia. E presupuesto como tal ta wordo entrega laat, ya cu e mester a keda entrega pa dia 1 di September di e aña aki. Tardansa pa trata e asunto di gasto di personal a resulta e reto mas grandi segun e mandatario, pero nan a sali di dje y a ricibi e draft di directie Financien diaranson ultimo. Diabierna awor lo trata esaki den Conseho di minister.

TARDANSA

E presupuesto di pais Aruba pa ley di comptabilidad, mester keda entrega mas tarda dia 1 di September di e aña prome. A haci tur intento pa logra esaki segun e mandatario pero toch no a logra. A splica e portal aki cu recientemente den e reunion di Parlamento pa trata e estado di Aruba, a splica Parlamento esaki y a pidi ‘despensa’. E asunto di reduccion di gasto di personal a resulta di ta mas dificil cu a kere, y ta un punto cardinal pa cumpli cu ne segun palabracion cu gobierno Hulandes.

DRAFT

E draft di e presupuesto a bolbe di directie financien diaranson segun Ruiz, y diabierna e ta keda trata pa ‘fine tune’ esaki pa despues mande otro siman pa CAFT y Raad van Advies pa analisis. E presupuesto ta poni pa yega e norma di -0.5% segun e FEM, y cu ta cuadra cu loke a palabra cu CAFT, como un normal cu ta realistico. Pa loke ta e reduccion di gasto di personal, tanto pa 2018 como 2019 esaki ta core den 12 miyon florin segun Ruiz. Pa loke ta e tempo cu ta tuma pa tanto CAFT y Raad van Advies trata esaki, ta premira cu esaki dura entre 2 pa 3 siman, pasobra mester duna nan tempo pa por pasa door di dje. Despues gobierno tin cu contesta esaki bek pa hunto cu e contesta, entrega e presupuesto e ora na Parlamento. Pues por papia di fin di luna prome cu ta asina leu.

LEY DI LAFT

Segun ley di LAFT, gobierno e ora tin te 15 di december di e aña aki pa trata y aproba e presupuesto, cumpliendo cu e ley di LAFT (cu ta duna CAFT e autorizacion pa haci su trabou). Fin di aña pasa, CAFT a duna gobierno te januari di e aña aki pa keda cla, mirando e situacion, pero finalmente a duna te fin di April di e aña aki pa tin e presupuesto aproba. Un di e condicionan tabata pa tin e presupuesto 2019 entrega pa 1 di September. Segun Ruiz, no tin ningun implicacion pa cu e hecho cu lo entrega e presupuesto laat.

  • Powered by SETAR