AHATA a renoba Cas Marijke di Stichting Kinderhuis Imeldahof

ORANJESTAD - Na Stichting Kinderhuis Imeldahof a tuma luga reapertura di Cas Marijke, despues di un bunita renobacion realisa pa Aruba Hotel and Tourism Association (AHATA). Cas Marijke ta un di e 4 casnan di Stichting Kinderhuis Imeldahof tin pa e muchanan bou nan cuido. Stichting Kinderhuis Imeldahof ta un parti grandi di e sistema disponibel na Aruba pa yuda cu nos problemanan social, y AHATA ta orguyoso di por a duna sosten y haci e experiencia un tiki mas agradabel pa e muchanan. 

Stichting Kinderhuis Imeldahof a haci un compromiso cu e comision di opvoedvisie, cu tin 6 elemento pedagogico. E proyecto di renobacion ta yuda cumpli cu e elemento di duna bon proteccion y cuido cariñoso. 

Durante e luna di Juli y Augustus AHATA a traha riba e proyecto, pa drecha Cas Marijke. Despues di a haci un inspeccion, AHATA a cuminsa cu trabounan di renobacion. Nan a drecha tur e murayanan di Cas Marijke paden y pafo, y a pinta a murayanan diferente color alegre.  E muchanan tabata hopi contento con e luga a keda. 

Turismo y siguridad ta importante pa AHATA, pero tambe bienestar di e comunidad, incluyendo nos muchanan. AHATA ta pensa riba e importancia p’e futuro di Aruba y p’esey ta contribui cu comunidad pa haci esaki miho. Tur cu a yuda den e proyecto aki tabata boluntario, cu a uni traha riba e proyecto aki cu yen di amor. Ta gradici empleadonan di Stichting Kinderhuis Imeldahof pa nan dedicacion y amor ofreci diariamente na e muchanan aki.

Den luna di September e enfoke di Stichting Kinderhuis Imeldahof ta riba bouwsteen number un; Lanta bo yiu den un ambiente safe y cariñoso. E meta cu Stichting Kinderhuis Imeldahof conhuntamente cu AHATA kier a logra den Cas Marijke ta pa crea un infrastructura safe y crea un ambiente atractivo pa nos mucha nan. Stichting Kinderhuis Imeldahof ta gradici AHATA, y specificamente, Vanessa Rasmussen y Luis Octavio Hoyos pa e bunita gesto y trabou.