AHATA: Gasto pa recohe sushi na e.o. hotelnan a triplifica

ORANJESTAD - Hotelnan na Aruba (entre otro) tin problema cu e aumento di cobransa pa recohe sushi, manera cu nan a wordo informa recientemente. CEO di e asosacion cu ta representa e.o. e sector hotero AHATA, Tisa LaSorte, a bisa NoticiaCla cu nan ta preocupa cu e gastonan pa recohe sushi comercial a triplifica. Cu esaki, LaSorte kier men e tipping fee, pues e cantidad di sushi. Y esey ta un problema cu nan kier soluciona. Si no yega na un areglo satisfactorio, lo tin cu bay resorta na aumenta tarifa di hotel pa por wanta e aumento repentino di gasto aki segun LaSorte. Den mesun rosea, LaSorte ta sigura cu no ta hotelnan so, sino hopi mas otro compania tambe ta hayando nan mes cu e situacion aki. 

COBRANSA TRIPLIFICA

LaSorte ta referi na e areglo nobo pa recohe sushi cu e intencion pa cera e dump na Parkietenbos. Awor cu tin un areglo entre Serlimar y EcoGas, e sushi tin cu wordo hiba otro caminda pa procesa, cu a causa cu e gasto a subi masha hopi mes segun LaSorte. " E gasto comercial pa nos, pa e hotelnan y otro companianan grandi na Aruba a bay di 60 florin pa ton di desperdicio, pa 180 florin pa ton. Esey kier men cu el a triplifica" LaSorte a bisa. Pa hink'e den un perspectiva, LaSorte a mustra tambe cu e recibo di cobransa mientrastanto a double cu p.e. si un hotel tabatin un recibo mensual di 10 mil florin pa luna pa recohe sushi, esaki a aumenta den un solo tiro, na 20 mil florin pa luna."Nos ta papiando di un cantidad hopi grandi di increase di prijs, cu no ta hayando atencion" LaSorte a bisa. 

SOSTENE E IDEA Mes momento LaSorte ta sigura cu AHATA y tur otro compania ta sostene e idea completo pa e.o. cera Parkietenbos, cu nos kier tin un sistema mas sostenibel, cu esaki ta nifica mas trabou pa mantencion, y cu tin cu paga mas. "Nos ta compronde full esey. Pero nos ta djis haya cu triplificacion di e tipping fee ta un cantidad hopi grandi" LaSorte a sigui bisa. 

SOLUCIONA PROBLEMA

A mustra cu inicialmente a purba di soluciona e problema aki di un forma mas priva, door di papia cu e compania priva cu ta atende e wastemanagement pa e diferente clientenan aki. A haya e splicacion e ora cu e gastonan a subi, pa motibo di e sistema nobo y cu tin un contract awor entre Serlimar y EcoGas cu e desperdicio mester bay EcoGas pa haci e proceso nobo aki mas sostenibel, y cu esaki ta costa mas placa. Tur esaki AHATA ta compronde segun LaSorte. "Pero loke si tabata un shock, tabata e gasto cu a increase asina hopi". Y no solamente esey, sino cu a haya notificacion di un dia pa otro. A manda un carta pa ministernan concerni 3 dia pasa y ta wardando pa un reunion pa wak con por revisa e triplificacion aki.