ORANJESTAD - Arubaanse Voetbal Bond (AVB) ta contento di mira e oportunidad cu un futbolista hoben a ricibi pa bay studia y hunga futbol cu FC Twente na Hulanda. Ethan Tromp ta un hoben di 16 aña y a milita den e team di SV Bubali. El a bay Hulanda pa un stage y FC Twente tabatin luga pa 1 hungado di Aruba y a scoge Ethan Tromp.
El a cuminsa hunga futbol cu su 7 aña cu Lifida di Bubali y asina el a sigui crece den e deporte aki. Ethan Tromp a forma parti di e seleccion U-15 aña pasa, unda cu el a participa den weganan di CONCACAF representando Aruba. E aña aki danki na AVB y Martin Koopman, scouting di Hulanda a scoge Ethan hunto cu otro 3 hoben pa core stage, unda cu Ethan y Moises a bay FC Twente y Kyle cu Xander a bay FC Utrecht. Famia di Ethan ta contento di e oportunidad duna na e futbolista. Den e team di Bubali e posicion di Ethan Tromp ta medio camp/bolante.
Pa AVB y Martin Koopman, head coach di seleccion nacional, e dia tabata uno cu yen di alegria. Prome a anuncia cu e A-Team lo hunga den Concacaf Nations League y e noticia cu un futbolista Arubano y hoben a haya e oportunidad di bay FC Twente. El a expresa cu esaki ta un stimulacion pa otronan cu tin un soño y tin e hendenan corecto pa yuda, e ora tin e posibilidad.
Desde cu a cuminsa cu e proyecto aki 4 hoben a bay Hulanda. Na FC Twente a bin un problema financiero ora cu e team a degrada y nan mester a atende cu e problema aki. E team Hulandes y Martin Koopman tabata di acuerdo cu Moises tambe tabata bon, pero como cu tabatin un luga so a scoge Ethan Tromp. E oportunidad aki AVB ta busca pa muchanan chikito y tin e pensamento ta pone e basis di futbol desde edad jong.
Ethan Tromp ta contento di e oportunidad cu el a ricibi cu FC Twente a busc’e, pero tambe cu Martin Koopman y AVB a yud’e. E ta gradici tur hende cu a yud’e cu awe el a ricibi un oportunidad asina aki cu e por yega leu. E oportunidad aki ta mustra cu mas Arubiano por yega leu den futbol y bay afo. Su soño ta pa un dia yega hunga pa Barcelona y pa por yega eynan tur cos ta cuminsa un caminda. “Mi ta cuminsa cu FC Twente y asina ey mi lo bay sigui crece”, el a expresa.
E ta conseha tur hoben pa sigui traha duro den deporte, pasobra nunca no sa kico por pasa manera e oportunidad aki cu e ta bay cu FC Twente. “Keda manera bo mes y sigui pusha duro pa bo haya un chend pa bay afo”.
MILAN – E ekipo di futbol professional Italiano Inter a gana su di 20 titulo di campeon di Italia, despues di a gana e final contra AC Milan dialuna atardi cu score di 2-1. Denzel Dumfries, e orguyo di Aruba a drenta den 7 minuut prome cu final di e partido , pero a keda expulsa algun minuut despues cu carchi cora na final pa un bringamento cu un hungador di AC Milan Hernandez cu a provok’e. Un asunto cu tabata canando caba. Cu e victoria aki, inter por pone un di dos strea riba nan uniform den e proximo temporada. AC Milan tin uno.
MILAN – E ekiponan rival Italiano AC Milan y Internazionale ta topa otro pa e titulo nacional. Interesante pa Aruba ta cu e ‘Arubiano’ Denzel Dumfries ta figura den e hungadornan pa e seleccion di Inter. E ekiponan ta rivalnan grandi di otro. Mientras cu Inter ta e faborito, 46% chens pa gana epartido, un victoria no ta sin mas. Milan lo haci tur cos pa daña e ‘fiesta’ di Inter. E hecho cu Inter a gana Milan 5-1 tempran den e temporada aki, no ta nifica nada pa e wega di awe nochi, segun comentarista italiano di futbol. E wega ta cuminsa pa 2:45pm ora di Aruba.
ATLANTA — E pelotero professional di Aruba Chadwick Tromp ta hayando mencion tras di mencion pa su prestacion actualmente den e ekipo di Atlanta Bravez. E siman aki tabatin un otro raportahe riba su prestacion, unda cu varios punto di Tromp ta resalta. Entre nan, su abilidad pa conecta cu pitchernan di su ekipo, e determinacion pa traha duro, e disciplina y su forma di ta. Y e prestacion actual pa e temporada aki unda cu e la habri 6 wega caba como e catcher principal pa e ekipo, ta wordo considera como remarkable.
ORANJESTAD - E tenshon ta subiendo mientras e edicion di 2024 di 12 Hours di Aruba ta acercando. Riba djasabra 20 di april, participantenan entusiasta di entre otro Aruba, Curaçao, Bonaire i Hulanda ta reuni na Sero Cristal pa un di e eventonan mas emocionante den e region. Cu un mescla di adrenalina, team spirit i pa un bon causa, e evento internacional aki organisa pa FX Hubada ta promete pa ta un espectáculo cu ningun hende kier perde.
LONDEN – Un grupo basta grandi di por lo menos 10 coredor di Aruba ta participa diadomingo na e marathon di London, considera como un di e marathon crucial internacional. Diabierna nan a registra nan mes oficialmente y a haya nan number y bib (e registro electronico) pa nan por participa. For di e portal deportivo 297 Sports, noticiacla a compronde cu tin por lo menos 50 mil participante diadomingo awor. Esnan di Aruba cu ta participa ta e.o. e docter di cas Joaquin van Trigt y e coredor conoci Shariska Winterdaal, Ana Mujica, Jeanette Croes, Lili Mejia, Edeline Weller, Filomena Paesch, Esther Colina, Carla Fingal y Ricky Refunjol. Potret cortesia 297 Sports.
BARCELONA – E strea internacional di tennis professional Rafael Nadal a anuncia cu esaki ta su ultimo aña professional. “ Mi ta considera esaki como mi ultimo aña y mi kier disfruta di cada momento” Nadal a bisa dialuna durante un conferencia di prensa na Barcelona. E la anuncia su participacion diamars awor na e torneo ATP na Barcelona. Ta su prome participacion despues di a retira tres luna pasa di e torneo na Australia. E ganador di 22 titulo grandslam, a dicidi ultimo momento pa participa e siman aki. E tenista di 37 aña di edad mester a sacrifica varios torneo debi na su condicion fisico cu no tabata optimal. Ultimo tempo e ta sufriendo di basta lesion y a indica aña pasa caba cu esaki por ta su ultio aña. Awe e la confirma cu esaki enberdad ta su ultimo aña hungando tennis professional.