Riu Palace Aruba y Riu Palace Antillas cu donacion special na SGT Peppers Friends

ORANJESTAD - Riu Palace Aruba y Riu Palace Antillas a haci un donacion na SGT Peppers Friends, un shelter pa cacho y pushi situa na Tanki Leendert. E organisacion a keda masha contento cu esaki. A regala e shelter cuminda pe cachonan. Hotelnan di RIU kier sostene e trabou di e shelter y ta reconoce nan contribucion importante na comunidad. E shelter ta balora hopi e gesto di RIU como cu e ta hopi importante pa nan ricibi e sosten di companianan local, como tambe individual pa por sigui cu nan trabou.

Durante e bishita Riu Hotel a ricibi diferente informacion di kico tur ta haci na e shelter. E boluntarionan di SGT Peppers Friends ta recoge e cacho- y pushinan for di caya y ta bay cu nan na e shelter.

Aki nan ta percura pa controla e bestianan, ta opera nan, vacuna y ta pone chip den nan. RIU Hotel tabata contento di por a haci e donacion aki pa asina yuda nan sigui provee na e bestianan, pero tambe nan por sigui cu nan trabou di kita cacho- y pushinan for di caya.