SAC a separa definitivamente di Grupo Uni, Gobierno y MUSICA

ORANJESTAD – Definitivamente Stichting Arubaanse Carnaval no ta forma parti di e loke mester bira e proximo organisacion di carnaval SMAC. Si esey ta nifica cu SAC no ta bay forma parti di carnaval di Aruba, tin cu mira ainda. Por lo menos, esaki ta e loke cu a sali for di e reunion di dialuna anochi, entre SAC, gobierno, Gruponan Uni, y MUSICA. E problema ta cu no tin confiansa entre e tres instancianan menciona, y como tal no por traha cu un situacion asina. “Mi ta kere te aki nos a yega”, presidente di SAC, Tecla Kelly a bisa NoticiaCla.com na salida for di e reunion dialuna anochi.

“Aworaki mi tin cu bay wak kico nos ta bay haci” Kelly a sigui bisa. . Nan a haci nan gastonan y nan tin cu bay wak con ta bay resolve e asunto awo. “Constantemente bo ta tende, mi no tin confiansa, mi no tin confiansa. Ken a bisa cu ami ta confia nan” Kelly a bisa, indicando cu tabata bisto cu no tin confiansa entre e gruponan.

Minister Oduber, ta lamenta cu e situacion a yega asina lew, y cu partidonan no a haya otro. “Tin un conflicto hopi grandi y no tin confiansa entre e gruponan. Niun no tin confiansa den otro” Oduber a sigui bisa. E proposicion di reparticion di posicion den un raad van bestuur nobo di SAC, a wordo rechasa segun Oduber. A haci varios peticion pa revisa esaki tanto dialuna mainta y diabierna, y a bin cu proposicion nobo atrobe. Ni asina, SAC no a aproba esaki, pero si otro dos instancianan.

A te hasta propone un asina yama ‘raad van advies’ cu lo por fungi como un ‘geschillencomissie’ ora cu tin asuntonan di problema entre nan. Pero esaki no a wordo acepta pa SAC tampoco, segun e mandatario. Segun Oduber, Sac no tabata dispuesto pa desvia di e programa di carnaval cu ya caba nan a hinca den otro. “E ora gruponan a bisa cu nan no ta djis bai sinta acerca y wak kico ta pasa” Oduber a bisa. “A agota tur posibilidad y gobierno ta bay fiha su posicion hopi rapido aworaki”. E desision pues cu a cay ta cu lo bay traha riba un stichting nobo cu yama SMAC, pa logra organisa carnaval di Aruba. SAC mientrastanto, segun Oduber, a bisa cu tin dos grupo di carnaval cu nan ta bay participa cune, pero no tin musiconan cu lo participa den un Calypso Contest. Pues e por bira un problema.

Di parti di e gruponan Uni, e vocero Kevin van Ommeren a splica NoticiaCla.com cu nan a tira asina hopi awa den biña, cu e biña ta mas ‘blanco cu e ta cora aworaki”. A traha varios proposicion, segun van Ommeren y cada bes SAC tabata nenga esaki. E problema principal segun gruponan uni ta cu SAC no kier duna participacion real na e gruponan. “Nos no kier inzage, nos kier participacion. Nos no ta loopjongen di ningun hende” van Ommeren a sigui bisa. A mustra cu si dado caso resulta cu SAC mes keda cu e permiso pa SAC organisa carnaval, gruponan uni no ta participa na carnaval. Pues si SAC organisa carnaval toch, esey kier men cu grupo uni ta for di carnaval. Por lo menos, un carnaval organisa pa SAC. Lo tin mas informacion den curso di diamars.