KVK ta tene Aruba Chamber Town Hall Meeting awe nochi

Posted on 9/5/2018, 11:47 AM AST | Updated on 9/5/2018, 11:48 AM AST

ORANJESTAD – Awe nochi Camara di Comercio y Industria di Aruba (KvK) ta organizando e Aruba Chamber Town Hall Meeting. E reunion aki ta un oportunidad unico pa e empresario por comparti su pensamento y puntonan di preocupacion pa loke ta e situacion empresarial di Aruba.

E evento lo tuma luga na Centro di Bario Dakota di 6:00 PM pa 8:00 PM. Durante e Town Hall Meeting lo enfoca riba diferente topiconan. Lo crea espacio pa discuti entre otro e siguiente topiconan:

Desaroyo economico y social, servicionan publico cu ta afecta bo negoshi of e forma di haci bo negoshi; Asuntonan cu ta afecta companianan den sector turistico y companianan cu ta distribui na e consumido local; Discusion riba impuesto na Aruba, kico a mehora, kehonan en comun y sugerencia pa mehora esaki.

Durante e anochi lo elabora mas riba tur e topiconan cu lo bin dilanti. E meta final ta pa trece dilanti na Parlamento y Gobierno di Aruba e puntonan cu ta brinda exito pa e comerciante en general na Aruba y alabes elimina obstaculonan cu solucionnan practico.

Pa por ta miho prepara KVK a pidi pa repasa e white paper cu ta forma e punto di salida pa por yega na e meta final. E whitepaper ta un documento cu KvK a traha a base di diferente reunionnan tanto cu sector publico y sector priva riba kico ta importante pa comercio na Aruba. Esaki bo por download for di e website via www.arubachamber.com/downloads/reports. Participacion ta gratis pero ta pidi encarecidamente pa registra door di manda un e-mail na businessinfo@arubachamber.com mencionando bo nomber y number di telefon of yama na 582-1566 ext. 27/35/42/30.