Decision pa Mike Eman keda lider di AVP a sorprende hopi hende

ORANJESTAD - E motivacion pa ex Prome minister di Aruba y lider di partido AVP, Mike Eman keda como lider y pone su mes reeligible pa un termino mas, ta loke mas a hala atencion despues di e decision anuncia diadomingo ultimo. Manera ta conoci, Eman a anuncia su desicion cu pa hopi tabata un sorpresa mientras pa otro e tabata e paso mas logico. NoticiaCla a compronde di fuentenan den e partido y cerca di Eman, cu esaki tabatin dos motibo. Y awor cu a convence pa keda, e ta contesta e dos motibonan. 

MOTIBONAN

E fuentenan den e partido berde a splica NoticiaCla cu Mike Eman for di aña pasa tabata 'sinta' cu dos mensahe cu e mester a traduci den accion. E prome tabata e caida den voto di AVP durante e eleccion parlamentario na september di 2017, y e di dos tabata e cantidad di voto personal den e eleccion ey cu a lag'e como e votegetter di partido y di Aruba su election. Esey tabata e debate dualistico cu e tabata bringa cu ne.  Ademas, tanto den e partido como pafor di partido, e cantidad di persona cu tabata pidie pa bay un termino mas (como lider) y esnan puntrando e pa 'bin bek', tabata grandi. Tur tabata cosnan cu e mester a delibera ariba y cu finalmente mester a keda contesta. 

OFERTA Y POSIBILIDAD Un di e posibilidadnan pa Eman tabata pa sali for di Aruba y keda envolvi den parlamento Europeo, manera cu defunto Mito Croes a intento algun aña atras. Esey tabata un di e motibonan cu el a opta pa retira inicialmente di e partido despues di e resultado di eleccion. Pero awor, e portal aki a compronde cu el a dicidi contra di e posibilidad aki. "Y internamente den partido Eman a nota e crecemento organico di hende hoben cu ta kere den e vision mas amplio di e partido y pa kico e partido ta para" e fuentenan a sigui bisa. Ta e plataforma hoben aki a posiblemente convence Eman cu e por añadi balor pa medio di su experiencia politico. 

PARLAMENTO

Ta keda si e parti cu hopi no a aprecia di Eman ,-segun otro analistanan politico-, e hecho cu despues di eleccion el a opta pa retira abruptamente y cede su asiento parlamentario enbez di drenta Parlamento. Esaki hopi a traduci como un acto di cobardia y no corecto. Pa e grupo di persona aki, nan ta bisa cu tempo lo mustra si e regreso di Eman como lider lo ta un paso positivo pa tanto Eman como e partido berde pa e proximo eleccion.