Suspension di director Elmar prolonga te fin di november

ORANJESTAD - E director di NV Elmar Robert Henriquez su suspension a keda prolonga te dia 26 di november 2018. Asina NoticiaCla a compronde di su fuentenan den Elmar. Hunta di Comisario a tuma e decision aki recientemente, y a opta pa prolonga esaki cu 4 luna di e fecha cu el a keda suspendi inicialmente cu ta 26 di juli ultimo. Despues a bin e informacion conocido comerciante y ruman homber di actual minister Glenbert Croes, esta Junior Croes lo a keda nombra como director. E noticia sinembargo mesora a keda desmenti pa directiva di Elmar. 

E SUSPENCION

Tabata dia 26 di juli ultimo cu hunta di directiva a informa cu e director di Elmar Robert Henriquez a keda suspendi incialmente  pa un periodo di 30 dia.  . “E decision no tabata uno facil , pero si uno necesario mirando entre otro e diferente kehonan serio di mal maneho y irregularidadnan den e compania, e kehonan di ‘secuestro’ cu a wordo haci recientemente na Landsrecherche y tambe e intrankilidad cu ta existi pa un tempo caba” e comunicado a bisa e momento ey.

INVESTIGACION NECESARIO

Mirando esaki, hunta di comisario a conclui cu un investigacion na e diferente keho y sospechonan ta necesario. E suspension aki ta sirbi tambe como un tipo di ‘koel af periodo’ den cual ta spera di por trece trankilidad bek na Elmar y frena e discusion politico negativo tocante e director y tocante Elmar cu ta tumando lugar. Hunta di comisario mester a interveni pa asina por cumpli cu su responsabilidad manera duna door di statute di Elmar. Pa loke ta e investigacion na e director suspendi, esaki a cuminsa de inmediato y lo mester wordo haci cu cautela y prudencia. Pesey mes, den interes di Elmar (y e director mes), hunta di comisario a abstene su mes di comentario despues di e dia y durante henter e proceso di investigacion. E hunta a pidi compression pa cu esaki.