Cillie: Trahadonan di hospital fada cu e situacion di holor di diesel

ORANJESTAD - E loke e enfermeronan di Hospital Horacio Oduber a haci awe mainta, esta di stop di traha den sala di operacion pa motibo di holo di diesel, e director di hospital Ezzard Cillie no kier cataloga como un 'accion'. Asina el a bisa NoticiaCla diamars mainta di e situacion cu a surgi ora cu e trahadonan a bandona e salanan di operacion como protesta

FADA DI SITUACION

Berdad ta, segun Cillie, cu e trahadonan ta fada di e situacion. Y cu situacion, e ta haya e problema di holo di diesel den e edificio, cu ta crea un ambiente no normal y saludable pa traha aden. E trahadonan awe mainta a sali pafo ora cu 'un biaha mas', nan a keda afecta pa e problema di holor aki. Segun Cillie, e cos aki a bira un cos di 'un pa dos biaha pa luna caba'. Tabata na october di 2017 cu NoticiaCla a raporta prome biaha di e situacion cu a surgi e dia ey. 

NO TA NORMAL

"E no ta normal mas" Cillie a bisa, refiriendo cu bo ta wordo confronta den bo ambiente di trabou cu tipo di situacion asina. "E fastioso ta cu unabez cu un empleado no ta deal cu un ambiente safe, e ta na nan pa duna e respondi pa haci algo over di dje" Cillie a bisa. Y esey ta loke e trahadonan a haci awe mainta. E asunto ta casi birando uno 'ongeloofwaardig' segun e director pasobra cada bez ta bisa cu ta 'ultimo biaha' pero e ta bolbe sosode. 

CULPABEL

Loke ta haci e cos aki mas pio ainda segun Cillie, ta cu e problema aki no ta culpa di hospital mes, sino di e compania doño di hospital, esta SOGA (Stichting Ontroerend Goed Aruba) y e mericanonan cu ta construyendo e hospital. Segun Cillie, a papia cu e sindicato tambe y a pidi minister pa haci algo. "Y ta e mesun peticion cu ami kier haci, y mi ta kere cu e minister mester actua aworaki si, pasobra e no por sigui manera cu e ta bay" Cillie a sigui bisa. 

OPERACION AFECTA

Pa loke ta e efecto di e problema awe mainta, Cillie a bisa cu a check cuanto hende (trahado) cu a keda cu ne cu no a keda afecta,     y cuanto camber di operacion por a ocupa pa laga e operacionan sigui mas tanto cu ta posibel. "Pero segun mi nos ta riba 50% cu 3 camber so. E otronan no tin hende available pa haci esey of nan ta malo of nan tin tanto last di dje cu nan no por bay den camber di operacion" Cillie a bisa. 

COMPRENDIBEL

E situacion segun Cillie di e leak di diesel no ta comprendibel mas pa e director. "Pero esey ta e efecto di ora cu e diesel drenta den e duct system di e airconditioning y ta pomp e, mande otro departamentonan cu ta pone cu hende tin molester di dje. "Pero atrobe, ki tipo di lekkage cu bo tin, ta strobabo" Cillie a bisa. Te na momento di combersacion cu Cillie, e no por a sigura cu e problema di awe a keda resolvi."Mi no por bisa si ta algo definitivo of temporario" e director a sigui bisa. E frecuencia cu cual esaki ta sosode (problema cu lekkage di diesel, ta casi 1 pa 2 biaha pa luna. Casi pa nos e ta normal, segun e director. NOTA: Potret ta di archivo di NoticiaCla di 11 di october 2017 ora cu e prome raportahe a bin di e problema di diesel.