Gobierno ta confirma tarifa 25 florin pa cobra na maart 2019

ORANJESTAD - Gobierno a confirma dialuna cu na maart 2019, Serlimar ta cuminsa cobra 25 florin pa recohe sushi    . Asina minister di transporte Otmar Oduber a bisa den conferencia di prensa dialuna mainta. Segun Oduber, meta cu tarifa di Serlimar ta pa yega na maneho duradero pa nos desperdicio na Aruba. 

Den e deliberacionnan cu tabatin den Parlamento a presenta un alternativa pa e tarifa cu anteriormente a negocia cu 3 sindicato pa por crea un tarifa social. Sinembargo, a mira cu den comunidad tabatin un resistencia pa esaki pa cual a pone cu a bay bek na mesa pa sinta y analisa e situacion y e metanan cu tin pa maneho di desperdicio pa futuro y remediacion dump Parkietenbos.Den cuadro di esaki Minister Oduber a anuncia y a haya aprobacion den Parlamento cu entrante maart 2019, lo introduci oficialmente e tarifa di 25 florin cu ta encera e dos componentennan esta recogemento y maneho di desperdicio. E parti di recoge a wordo determina na 17,50 florin mientras cu e parti di procesamento/maneho cual aworaki ta tuma luga hopi limita na sero thijshi a keda defini na 7,50. Nan dos hinto ta forma e prijs di 25 florin.Segun Oduber, tur hende na Aruba mester por contribui na limpiesa di nos isla, a base di e tarea cu Serlimar tin pa mantene bienestar general. Parlamento den un mocion cu nan a presenta a pone cu ta considera cu e ‘toelichting’ di e ley ta permiti pa tin e espacio pa otro companianan priva cu ta brinda e servicio pa por wordo exonera. Esey ta significa cu ora cu bo tin un otro compania cu ta recoge bo sushi na e momentonan aki, cu e compania ey lo ta responsabel pa e diferencia den suma (7,50 florin) cu mester wordo paga pa maneho di desperdicio. E 17,50 pa recogemento di desperdicio, Serlimar lo absorve e ora y conforme e mocion den parlamento lo duna exoneracion na esnan cu tin compania priva pa loke ta (huishoudelijk afval), Minister Oduber a splica.