Conocido percusionista di Corsou Pernell Saturnini a topa prensa internacional

WILLEMSTAD - E percusionista yiu di Corsou internacionalmente galardona Pernell Saturnino(56) tin algun tempo bek na Corsou, despues di a biba den exterior. Cu varios nominacion pa e premio Grammy y uno gana, e ta e percusionista local mas conoci internacionalmente. E fin di siman aki, prensa internacional di bishita na Corsou pa cubri e di 8 edicion di Curacao North Sea Jazz Festival, tabata di bishita na cas di Saturnino pa un encuentro interesante. Despues di apenas algun rato na su cas, y den su presencia, tabata bisto cu Saturnino no ta 'ken cu ta'. 

INSTRUMENTO

Saturnino a introduci e miembronan di prensa internacional (incluyendo NoticiaCla) na varios instrumento tipico di Corsou, y a mustra su habilidad riba cada un di e instrumentonan. Entre nan e cacho cu antes tabata wordo usa pa manda mensahe (suplado di cacho), e chapi cu su palo di bati, te na e tambu. A siña e miembronan di prensa con pa toca cada instrumento, y cada historia tras di e 'instrumento'. 

HISTORIA DI SATURNINI

Cos a bira mas interesante ora cu el a cuminsa conta di su historia musical. Uno tras di otro e preguntanan tabata bin dilanti, y aunke Saturnini no tabata kier a conta di su bida, el a resulta ta conta partinan sumamente interesante. E.o. con el a bay studia musica na Berklee College of Music na Boston na 1988. Saturnini a conta con despues di su graduacion, den un siman di tempo noticia di su logronan a plama, y e tabata mei mei di e grandinan manera saxofonista Paquito D'Rivera den e United Nation Orchestra, y tambe WDR Orchestra. Saturnini a menciona un lista di artista cu el a traha cu ne, sea graba, of toca of ambos, y finalmente tambe con enberdad el a gana e premio mas cotisa pa un artista musical internacional, cu ta e premio Grammy. Fuera di e premio e tin varios medaya como 'nominado' pa e premio tambe. 

LOCALMENTE

Recientemente Saturnini ta bek na su isla natal, cu e meta pa engrandece e musica di percusion pero principalmente yuda e hubentud cu musica folklore y sigura cu e musica aki no bay perdi.