Bureau Integriteit ta bira realidad entrante 1 di october proximo

ORANJESTAD - E Bureau Integriteit lo ta funcional entrante 1 di october proximo. Asina prome minister Evelyn Wever a anuncia dialuna mainta durante conferencia di prensa. For di januari di e aña aki, Wever a splica cu e intencion tabata pa durante e prome aña di gobernacion introduci e asina yama ‘integriteitskamer’ osea e ‘camber di integridad’. E camber aki tin cu scrutina tur proyecto y asunto di gobierno pa sigura cu esaki ta cumpli cu tur norma di integridad. E mandatario no a splica si ki structura e camber aki lo tin. Loke si e mandatario a bisa, ta cu e lo consisti di un grupo di persona  ‘no politico’, sino e ta ‘beat the whole purpose’.

PLANEACION

For di comienso segun Wever, gobierno a dicidi cu ta bay cana tres trayecto pa yega na e tema di integridad, manera cu a priminti den campaña electoral. E prome ta trece integridad den tur trahado di gobierno. Pa logra esaki, lo tene curso y training pa tur trahado di gobierno pa nan ta conciente kico ta bon gobernacion y kico ta integridad. E ta bay tin un tarea grandi den trece control. D di dos punto tin di haber cu e camara di integridad. E camber lo controla tur loke ta integridad. A uza ehempel e destaho di hospital, cu tin cu bay scrutina tur e aspecto prome cu e deal wordo cera. E di tres area di integridad ta pa bin cu e leynan cu falta na Aruba pa por garantiza integridad y bon gobernacion. Wever a mustra cu esaki ta cuminsa na nivel di gobierno. Cu esaki e ta referi na e.o. introduccion di e leynan necesario manera esun di financiamento di partidonan politico, e screening di parlamentario y ministernan, ley di ombudsman y klokkeluiders regeling. “Tur e leynan aki tin cu garantiza cu e politico tene su mes integra”. Nan tur ta leynan cu tin hopi prioridad, aunke un di nan sigur ta esun di screening. E prome mandatario a mustra cu e ley tabata iniciativa na mei aña pasa y tabata iniciativa di partido AVP. Sinembargo a opta pa cambi’e pa acomoda corupcion y e ley nunca a drenta na vigor, pasobra tabatin conseho hopi negativo.

KEN TA DEN DJE

Pa loke ta e personanan cu lo forma parti di esaki, manera a bisa inicialmente, no ta conoci ainda segun Wever Croes. “ Ta diseñando e structura di e comision, cu ta encera tambe kico ta e areanan di control, pues kico tin cu controla, kico e rekisito ta, y lo traha un perfil di kico e personanan cu ta forma parti di e comision, mester cumpli cune. A base di esey, lo cuminsa busca persona” Wever a sigura NoticiaCla. Pa loke ta e nombracion di e personanan, a mustra cu e personanan aki lo no wordo nombra pa bida, sino mas bien manera miembronan di CAFT ta wordo nombra. Esey ta encera tambe cu no ta nombra nan pa 'bin cu gobierno y bay cu gobierno'.