Wever: Lo evalua situacion den hotzone pa haci esaki mas sigur

ORANJESTAD - Gobierno kier evalua e situacion actual na e area turistico na Palm Beach, conoci como hotzone. Ta trata di e strip dilanti hotel unda cu tin entre otro e clubnan nocturno y barnan popular. Den fin di siman un hoben a perde su bida dilanti un di e barnan, ora cu el a haya un hinca cu cuchiu cu a resulta fatal. Prome minister Evelyn Wever na comienso di su conferencia di prensa dialuna a toca e tema brevemente. Y den liña grandi a mustra cu tin cu bay traha riba e aspecto di seguridad y posiblemente horario di e establecimentonan aki. 

PREOCUPA

Segun Wever, emorto lamentabel di un hoben den fin di siman ta motibo pa gobierno ta hopi preocupa. Wever a haci apelacion pa comunidad ta mas tolerante y respetuoso pa bida. E mandatario a mustra cu e kier wak kico por haci cu e hotzone, pa haci esaki mas sigur. Entre otro Kker ta mas preventivo den e hotzone, pone mas blauw riba caya, incluyendo presencia di mas ambulance. Tambe ta bay wak horario di cierre di e establecimento, segun Wever y wak con ta cambia esaki. Mas den detaye e mandatario no a bay, lagando e tema specifico pa colega minister di husticia Andin Bikker.