Gobierno di Aruba a celebra dia di prensa cu periodistanan local

ORANJESTAD - “Libertad di expresion ta un derecho fundamental y ta trece e responsabilidad pa entrega informacion corecto y berdadero”. Den un encuentro ameno cu Prensa di Aruba diabierna atardi, Gabinete Wever-Croes a felicita y gradici esnan cu ta traha den prensa. Prome Minister Evelyn Wever-Croes a expresa cu ta importante pa reconoce e trabou di prensa den nos comunidad. Na Aruba nos por considera prensa como e di cuatro columna di nos democracia. Libertad di expresion ta un derecho fundamental y ta trece e responsabilidad pa entrega informacion corecto y berdadero pa nos comunidad, kedando den e margen di respet y profesionalismo. “Ta hopi importante pa un pais, pa prensa uza su libertad di expresion na un manera responsabel y cana den e margen di locual ta libertad y no libertinage. Ora cu prensa ta wordo mal uza cu intencionnan pa reparti informacionnan incorecto, manera e fenomeno di ‘Fake News’ of te hasta pa daña nomber di nos dushi Aruba, nos ta e ora na un punto hopi peligroso. Libertad di expresion ta un derecho fundamental di nos tur pero ta keda na prensa pa mantene, conserva y proteha e derecho importante aki”, ta e palabranan cu Prome Minister Evelyn Wever-Croes a expresa. Diferente miembronan di prensa tawata presente diabierna atardi, un dia prome cu Dia di Prensa, na Bestuurskantoor na un encuentro cu Gabinete Wever-Croes a organisa pa nan. Por bisa cu esnan presente a keda hopi contento cu e gesto aki di Gobierno expresando cu esaki ta prome biaha cu un gobierno a invita prensa pa celebra Dia di Prensa y reconoce e trabou cu nan ta desplega.