KC & The Sunshine Band y Grace Jones a mustra cu nan t'ey pa keda

WILLEMSTAD - E expectativa pa e artistanan manera; Carlos Vives, Christina Aguilera y KC & The Sunshine Band tabata halto pa e di tres y ultimo anochi di Curacao North Sea Jazz Festival 2018. E prome pa sorprende tur hende, tabata KC & The Sunshine Band. Un publico enorme (mas cu a spera, di e grupo veterano aki), a presenta na e tarima di Sir Duke. E grupo cu a lanta na 1973 na Hialeah, Florida, a mustra cu nan t'ey pa keda. "Kico a pasa?", Harry Wayne Casey (for di e fam a deriva e letternan KC) a puntra e publico. "Mi tin 67 aña. Kico a pasa?" el a sigui bisa. "Wak bon, aki 30 aña, asina Justin Timberlake ta bay mustra". Mesora a drenta den e musica cu su hitnan manera 'Thats the way ( I like it), I'm your Boogie Man', y hopi tempran a bay pa loke ta nan unico balada di e añanan 80, pero porta e cancion, pa cual nan ta mas popular, 'Please don't go'. Notabel tabata cu hasta esun mas jong si tabata conoce e cancion ey, pero porta e otronan no. Cu e energia increibel, e banda su integrantenan incluyendo e fundador y cantante Casey, a mustra cu nan t'ey, ohala pa hopi tempo mas. E escogencia pa trece KC & the Sunshine Band, sigur a resulta di ta un exito total.

GRACE JONES

Pa loke ta Grace Jones, e Jamaiquina excentrica di 70 aña, tambe a mustra cu e no tin pensa di retira pa awor. E comienso di dje no a sorprende ningun hende, ora cu el a cuminsa su presentacion cu un masker bisti y curpa completamente decora cu dibujo na blanco. Pocopoco e tabata cambia di vestuario durante su presentacion, pa entrene e publico cu su estilo peculiar. Su cancionnan mas popular 'Pull up to the bumber', y 'Slave to the Rythm' tambe a keda presenta diasabra anochi. Debi na su edad, e genero hoben no tabata sa ken e ta, pero asina mes a sa di disfruta di su musica y su expectaculo excentrica.