Carlos Vives a demostra su energia musical na CNSJ 2018

WILLEMSTAD - E hit di anochi pa hopi (porta te hasta mayoria) tabata e cantante Colombiano Carlos Vives (57), procedente di Santa Marta Colombia. Conoci pa a revoluciona e musica vallenato den uno mas moderno y energetico, Vives no a defrauda su audiencia grandi diasabra anochi na Curacao North Sea Jazz. Cu por lo menos 18 disco produci, y un sinfin di exito, Vives tabatin algo pa tur hende. La Gota Fria, Fruta Fresca, Pa Mayte, y esun porta mas pidi La Bicicleta tur a wordo presenta, y cu esun di La Bicicleta, el a subi cu e bicicleta riba tarima, pa deleita e publico. Debi na su energia continuo, y e clima calor, Vives a hay'e ta cambia su camisa varios biaha, te na e punto cu e tabata botona su camisa robes. Un sinfin di musica exitoso a keda resona, y prome cu bo tabata sa, un ora di presentacion a pasa. "Si ta pa mi, e por a sigui presenta trankil dos ora mas" un fiel fanatico a bisa NoticiaCla.