Patty LaBelle y Jason Derulo a luci na CNSJ 2018

WILLEMSTAD - Daddy Yankee y Damian 'Jr. Gong' Marley tabata e dos grandinan di e prome anochi oficial di e di 8 edicion di Curacao North Sea Jazz Festival. Esey no ta kita afor cu e duo Sting y Shaggy, Jason Derulo y Patti LaBelle tambe a luci. Y claro pa e aficionadonan mas intenso di Jazz, tabatin Kamasi Washington y Spyro Gyra. E anochi tabata grandi y e publico a acudi masalmente atrobe. E organizadornan por mira bek riba otro anochi exitoso. 

PATTY LABELLE

Patty LaBelle, considera porta como esun cu ta reemplaza e recien fayecida Aretha Franklin, a deleita e sala airecondiciona CELIA completamente yen cu su repertorio legendario. Kibrando tur regla, LaBelle a pidi tur hende saca cuanto potret cu nan kier, filma cuanto cu nan kier, pasobra 'ainda mi make up ta bon'. "Probecha, saca potret y laga mi pose" LaBelle a bisa su audiencia. El a recorda tur hende cu e tin mas di 50 aña den e mundo aki y cu hende tin cu disfruta di cada momento di bida. 

KASAMI WASHINGTON

Un saxofonista corpulento, pero poco conoci durante su presentacion riba e tarima Sir Duke, a mustra di ta un persona suave, hopi spiritual y agradecido di loke el a experencia. Entre su repertorio jazzista exitoso hunto cu su cuarteto di Los Angeles, consistiendo di e.o. bahista Miles Mosley, el a splica di ta bendiciona di por a biaha asina hopi y scucha asina hopi idioma, cu ta tipifica e pais di cual e tabata bishita. Aunke su publico no tabata hopi grandi, esnan presente sigur tabata su siguidornan di alma y curpa. 

JASON DERULO

Mientras cu e tabatin su siguidornan sigur diabierna anochi, Jason Derulo pa hopi tabata un desconoci te ora cu el a presenta e prome tononan di su repertorio. Entre nan, e tema principal di e mundial di futbol di e aña aki. Un homber cu a pasa den hopi cos, a splica e parti ey tambe diabierna anochi, di un forma humilde, di con agradecido e ta di por tabata escogi pa tin e tema principal di e mundial. Na comienso, el a presenta un video repasando tur su actonan exitoso; varios entrevista popular y te hasta un incidente cu a afect'e. Pa su siguidornan, ta conoci cu e tabatin su prome exito cu su prome salida na 2009, ora cu su prome exito a yega na e prome lugar riba cartelera Mericano. Notable tabata e publico full dilanti, cantando cada letra di su cancionan 'a todo dar'.