Resistencia di un grupo ta prolonga impasse pa constelacion nobo carnaval

ORANJESTAD – Mester di mas tempo pa por sali for di e ‘impasse’ cu tin riba e formacion di e organisacion ‘nobo’ di carnaval di Aruba. Un reunion dialuna mainta cu mester a conduci na un decision final riba con e constelacion di e organisacion, a keda posponi un biaha mas te dialuna anochi 7’or. Segun minister di Cultura Otmar Oduber, tin un grupo cu no por caba convence su ‘achterban’ di e cambionan proponi. E mandatario no kier a bisa cua di e gruponan e tabata referi na dje. 

E motibo si segun Oduber, ta cu e ta trata di cambionan relativamente grandi cu lo sosode, pa cual cierto grupo mester di mas tempo pa digestiona e cambionan aki. A bay den detayes den e reunion aki y kico e consecuencianan lo ta si e proposicion no wordo aproba conforme e preocupacion di e tres gruponan aki.

Ta conoci cu esun cu tin mas di ‘perde’ den e constelacion aki, ta SAC mirando cu nan lo perde gran parti di e ‘grip’ cu nan tin aworaki. Esaki pasobra e proposicion di e comision ta cu mester habri henter e ‘raad van bestuur’ y duna tur hende chens. Algo cu te awor, SAC so tabatin den su man. Si dialuna anochi e gruponan ainda no por haya otro, ta tuma un decision toch, y esey lo ta final. Mes momento Oduber a sigura cu si partidonan haya otro dialuna anochi, lo firma esaki mesora den un acuerdo.

Tabata durante e encuentro diabierna entre gobierno, SAC , Gruponan Uni (di carnaval) y MUSICA a produci e proposicion pa SAC (Stichting Arubaans Carnaval) presidi e hunta di supervision di e SAC 'nobo temporal', cu e intencion pa e organisacion nobo SMAC tuma over e siguiente aña. Tur ‘stakeholder nan’ a reuni diabierna mainta pa 2 ora, unda cu a haya otro y palabra cu dialuna mainta lo a dicidi finalmente kico e structura final ta bira di nos organisacion di carnaval.

Riba papel tin un proposicion di con lo dividi e tareanan di e Raad van Bestuur di SAC cu tin cu tuma lugar. E raad van bestuur, segun proposicion, lo tin como presidencia, SAC, vice presidente Grupo Uni, e tesorero ta bin di un nominacion di tur tres grupo (SAC, Grupo Uni y MUSICA). E directiva diario ta wordo amplia na 6 persona unda cu e di dos tesorero lo ta SAC, di dos secretario ta Grupo Uni y Musica. Asina tur hende ta haay participacion den e grupo.

E compromiso segun Oduber, ta cu lo organisa carnaval 61 conforme e rapport cu e comision recien a traha, y cu pa carnaval 62 lo tin un organisacion nobo conforme e rapport cu e cambionan necesario. “Esaki ta un proposicion y esnan presente a bay di acuerdo, pero tin cu haya sosten di nan seno. Si tin boluntad manera cu a sinti diabierna, loa  tuma e decision dialuna mainda cu e rapport lo wordo integralmente ehecuta cu un fase transitorio.