Daddy Yankee a canta karaoke cu 'Despacito' na CNSJ

WILLEMSTAD - Daddy Yankee a canta karaoke cu 'Despacito' na CNSJ. Esey ta djies un di e artistanan cu a luci, pero sigur esun mas anticipa. Prome cu esey tabatin e yiu di legendario Bob Marley.Damian Marly tabata un di esnan cu a hala un publico hopi grandi diabierna anochi riba e tarima band'i laman. Sir Duke Damian tabatin apenas 2 aña, ora cu su tata a fayece na 1981, pero tabata notabel cu for di e introduccion, cu ta su tata tabata su entrada. Su apodo 'Jr Gong' ta na honor di su defunto tata, a.k.a. 'Tuff Gong'. Un tras di otro Jr Gong tabata deleita su publico cu su exitonan, mustrando cu esaki ta un otro Marley exitoso, manteniendo e nomber y honor di su tata, como e legendario di e musica reggae. 

STING Y SHAGGY

E duo Sting y Shaggy pa hopi ta uno incomprendibel. Pa Sting, esaki tabata su di dos bishita na CNSJ (e prome tabata na 2011), pero awor cu e cantante Jamaiquino Shaggy, como su 'partner musical', el a trece un dimension diferente. Esnan cu porta conoce djis Sting, no a keda decepciona, pasobra te hasta combina cu Shaggy, a sa di presenta algun di su exitonan bieu manera; Englishman in New York y mas. Pero ta su exitonan nobo hunto cu Shaggy ta e motibo di su bishita, y ora cu su exito popular 'Dont make me wait' a zona, tur hende a lubida cu e duo tabata uno 'incomprendible y inusual'. Sting ta keda Sting,y Shaggy ta keda Shaggy. Pero hunto, nan tabata un 'bom musical' diabierna anochi. 

DADDY YANKEE

For di hopi skina por a tende cu e cambio di ultimo ora di Sean Paul pa Daddy Yankee, tabata hopi positivo y te hasta cu 'a yuda e festival', debi cu Daddy Yankee pa hopi tabata mas popular y gusta pa tur hende. Sigur mirando e hecho cu Daddy Yankee ta co-presentador y autor di e exito mundial 'Despacito'. Esey so a pone cu e tarima Sir Duke kisas a resulta chikito, pa e anochi. Cu un retraso di casi un 45 minuut pa motibo tecnico, Daddy Yankee a aparece y den un rato di ora, tur hende a lubida cu e artista di Puerto Rico, conoci como 'Ramon Luis Ayala Rodriquez, tabata laat. Mientras cu tur su exitonan popular manera: Dura, Gasolina y Shaky Shaky tabata pone tur hende bira euforico, tabata (comprendiblemente) te na final cu Daddy Yankee a los loke tur a bin tende. "Ban participa den un karaoke. Ban pretende cu bo ta den sala di bo cas, den sofa, relaha y ta cla pa bay canta karaoke" Yankee a cuminsa cu su introduccion. Y djey ora cu e tononan di Despacito a cuminsa, e publico a tuma over y a bira su 'co cantante', cantando e parti di Luis Fonsi (e otro cantante di e cancion Despacito). Tanto grandi y chikito, tabata convenci cu e anochi tabata di Daddy Yankee, e 'salbador' di e festival. NOTA: Potret di Sting/Shaggy ta cortesia di Jeroen Jansen.