CNSJ 2018 a bin bek y mas duro cu nunca diahuebs anochi!

WILLEMSTAD - Silvestre Dangond a 'steal the night' cu su presentacion diahuebs anochi na e 'free thursday' di e evento. Farruko, e otro artista (di genero reggeaton) cu a habri e festival, tambe tabatin su siguidornan. Pero ta ora cu Dangond a cuminsa, a nota un ambiente den e centro y un yeno mas grandi ainda. Como tal,  ta 'safe' pa bisa cu organizadornan di e di 8 edicion di Curacao North Sea Jazz Festival por wak bek riba un prome anochi exitoso. Considera como e 'free night', y cu hopi a kere cu pasobra a 'skip un aña', e impacto tabata menos. Pero esaki no a resulta e caso y tabatin un yeno total pa norma di diahuebs. Tabata manera nunca a perde un aña y no por a nota nada di un posibel impacto negativo. 

Tur cos tabata perfecto, y esnan cu ta acostumbra di bin e festival, tanto local como internacional, tabatin palabra di elogio so. "Esaki ta un festival", un amante di festival Arubiano a bisa NoticiaCla. E ta conta cu el a bishita festivalnan grandi caro na Merca, pero e experiencia di Curacao North Sea Jazz, ta lo maximo p'e. Otronan cu a bin pa prome biaha, (tambe Arubiano) a bisa mescos. "Wow, que experiencia". Y esnan cu ta bin tur aña, tabata bisa simplemente "Danki Dios e ta bek, spera e no bay nunca mas". NOTA: Potretnan di artista Farruko, ta cortesia di Jeroen Jansen.