Analisis: Con mester interpreta e Dia di Prensa?

Nos ta na vispera di un otro 'celebracion' di Dia di Prensa na Aruba ( y otro partinan na mundo). E palabra celebracion ta 'entre comillas' pasobra no ta sigur si nos tin algo di celebra. Tur aña nos ta para dilanti e mesun dilema. Con nos tin cu interpreta e fecha aki? Mescos cu tur otro celebracion di un fecha special dedica na un profesion, un instancia, of persona, ta bin e pregunta si esaki ta algo di celebra, di conmemora, of pa para keto y analisa kico tur e fecha aki ta nifica. Pa hopi, e ta djis un otro dia mas di trabou, un dia liber (depende e fecha) y cu hopi ta laga pasa manera nada. 

Pa nos, cu ta yama nos mes periodista, y ta haci e trabou periodistico tur dia, hopi tin duda si nos tin algo di celebra. Entre e coleganan hopi biaha bo ta mira un tipo di colegialidad, no necesariamente amistad. Ora cu bo ta anda cu otro tur dia, den tur skina, e colegialidad ta yuda bo hopi y no necesariamente mester ta amigo di otro. Ta bin e pregunta di semper, si 'prensa ta uni'? Y e contesta ta, depende con bo wak e. Prensa na Aruba ta colegial cu otro. No necesariamente uni. Y bo ta nota esaki, ora cu tin cu para pa cierto principio. Ey ta unda cu e rabo di e porco ta krul. Pero esaki no necesariamente ta e falta di e periodista, sino kisas di e doño di trabou di e periodista. Mientras cu e periodista mes tin un amistad cu su demas coleganan, e doñonan di trabou hopi biaha tin un rivalidad cu otro, cu ta stroba e 'union' di prensa di materialisa den algo fuerte, cu ora cu mester para pa algo, esaki ta keda na 'aroz y coco'. P'esey, nunca mas un 'press club' no a funciona, debi na netamente esey: E rivalidad comercial entre e medionan di prensa (lesa: e doñonan di e medionan di prensa). 

Como periodista na Aruba, bida no ta facil! Sigur no den un comunidad chikito. E trabou ta bin cu su retonan. Y si bo haci e trabou manera mester, no spera un danki p'e ni tampoco cu tur hende lo keda contento. Y awendia cu e rednan social disponibel, nos por ripara esaki mas y mas publicamente. Esey no kiermen cu ta algo nobo, sino simplemente e pueblo lesador, a haya un vehiculo pa tambe opina publicamente. Reaccion riba articulo tin tur dia. Si e reaccion of comentario tin base, mi ta laga pa e lesador. 

Nos meta (di NoticiaCla sigur), ta simplemente di informa a base di e echonan y laga e comentario pa e lesador. No ta na nos, como periodista, pa duna nos comentario/opinion propio. Si e otro medionan ta hacie, ta keda na nan. Y aki mi kier para keto un rato. Hopi biaha, den caso di NoticiaCla, e comentarionan ta bin fuerte, y hopi biaha (pa falta di informacion of simplemente mas bruto bisa; ignorancia) e comentario no ta funda of fuera di base. 

NoticiaCla ta un medio, cu for di su nacemento a scoge pa hiba periodismo den un cierto forma. Tin cu no ta di acuerdo cu ne, y esey ta nan derecho. Nos a ripara cu, ni maske cuanto biaha nos splica nos forma di traha, tin hende sea ta scoge of ta lubida pa kico NoticiaCla ta para p'e. Algun dia pasa nos a experencia esey atrobe. NoticiaCla tin algun regla basico. 

No ta publica potret di accidente grafico, no ta publica potret di e sospechosonan deteni sin mas (ta tapa cara di e persona, aplicando e codigo di bordeau (codigo internacional di periodismo)). Pero ni maske cuanto biaha nos splica esaki, e critica ta bin na ordo. "Otro media si a publica e potret, pakico boso no?, Boso ta haci druk, y ta depende ken, boso ta publica e potret. Boso no ta serio!, " …Y asina tin hopi mas. Nos mensahe e ora ta, 'Danki pa lesa!" pasobra esey ta loke bo a haci, si bo a comenta. 

Otro regla cu NoticiaCla tin ta, cu ora cu bo comenta den un forma menos decente, uzando palabra 'malo', bo comentario ta wordo  elimina. Esey ta nos 'reglanan di cas'. Ta keda na e lector si e ta sigui lesa nos of no. Tempo a mustra cu e mayoria di lector a sa di aprecia e maneho. Cada un tin nan mercado, y cada un tin nan regla y codigo di etica y profesionalismo pa traha cu ne. 

Dia di Prensa ta un dia cu notablemente hopi comerciante kier uza pa sea felicita y invita nos, pa mustra nan aprecio, pero mes momento algun ta 'spera' un cobertura tambe, pa pueblo sa, con agradecido nan ta. Claro cu tur atencion ta di aprecia, ya cu na fin di dia, ta danki na e comerciantenan aki, nos ta na bida. Esey ta e realidad di bida. E aña aki no lo ta un excepcion. 

Dia di Prensa ta un bon momento pa nos reflexiona riba e trabou y funcion primordial como periodista of locutor, cu ta di informa bo comunidad debidamente y haci bon uzo di e medio cu bo tin, pa trece loke ta berdad dilanti, sin dun'e bo toke di opinion personal. Esey ta nos trabou!!!

Feliz dia di prensa!

Tito Laclé

NoticiaCla