Croes na Hulanda: No pone norma nobo pa nos den cualkier ley of LAFT

ORANJESTAD - Hulanda no mester pensa pa pone un norma nobo pa Parlamento den cualkier ley of LAFT den futuro, pasobra e lo no wordo acepta. Asina Parlamentario Endy Croes (MEP) a bisa durante e reunion publico unda cu ministernan di gabinete Wever Croes a bin 'duna cuenta' di e estado financiero di nos pais Aruba.  Durante su disertacion, Croes a manda un mensahe directo pa e instancianan Hulandes y nan respectivo representante manera Raymond Knops (Gobierno Hulandes), Raymond Gradus (CAFT) y miembronan di Tweede Kamer, cu un mensahe pa no mete cu Aruba. Prome minister Wever Croes no a reacciona ainda riba peticion di NoticiaCla, si e ta sostene e pensamento aki si of no. E reunion a cuminsa diahuebs mainta, y ta premira cu esaki lo sigui dialuna. Diahuebs atardi, e ministernan a cuminsa duna nan reaccion riba e preguntanan haci di e parlamentarionan mas tempran. 

NEGOCIA PERO CU RESPET

El a bisa cu ta di sumo importancia (pa sa cu) si Hulanda kier negocia cu gobierno, e ta e derecho di Hulanda. No kere cu bo ta ancr'e como un norma y ta bin riba un altar di sacrificio den parlamento aki y cu e parlamento aki lo tin cu bisa 'ja baas' " Croes a bisa."Laga esaki ta un indicacion cu nos ta para fuerte pa nos autonomiaa. Nos lo trata otro cu respet. Nos lo cumpli, si mester cumpli cu e normanan di deficit, pero hamas y nunca no pone un norma nobo pa nos den cualkier protocol of cualkier ley di LAFT den futuro. 

NEGOSACION

Actualmente Aruba y Hulanda ta den negosacion pa un ley di LAFT nobo pa garantisa continuacion di e supervision financiero di e comision CAFT. E intencion ta pa establece normanan nobo aunke no ta conoci ki norma esaki lo ta. Gobierno Hulandes a bisa NoticiaCla den pasado recien (Raymond Knops) cu e tin tur confiansa cu Hulanda y Aruba lo haya otro. Con gabinete Wever ta bende e areglo cu Hulanda na Parlamento, ta keda completamente pa responsabilidad di Wever-Croes. Den pasado, fraccion di MEP tabatin problema caba cu e supuesto metemento di Hulanda pa cu esaki, y a sinti cu Hulanda lo ta purbando di kita autonomia di Aruba riba e tereno aki. Pues e ta algo cu fraccion di MEP tin basta tempo ta vigilando, y cu e declaracion di Croes diahuebs, e ta mustra cu e fraccion no a desvia di e rumbo aki. No ta conoci ki tempo e negosacion aki lo termina. Hulanda a bisa caba cu nan ta cla, pero cu ta wardando riba Aruba.