Peticion di ex minister di Corsou Jamaloodin declara inadmisible

WILLEMSTAD - Corte den prome instancia na Corsou a declara ex minister George Jamaloodin no admisible den e caso sumario cu el a entama contra pais Corsou. Esey tabata e sentencia presenta awe mainta 11or. 

CARACAS

Jamaloodin ta na Venezuela deteni, pendiente di su extradicion pa Corsou. Den e caso sumario actual, e la pidi pa ordena Corsou pa informa autoridad Venezolano cu e no ta deteni  riba orden di un huez di Corsou, y cu su detencion ta empugna cu statuut. 

HUEZ

E huez di e caso sumario sinembargo a dicta cu Jamaloodin ta na 'adres robez'. E peticionnan cu Jamaloodin a entrea, tin di haber cu e ta wordo sospecha di casonan penal. Pa un caso di urgencia cu ta necesario relaciona cu husticia criminal, ley conoce un procedura especial cerca un huez di caso penal. Pesey Jamaloodin no por trata e caso cerca un huez pa caso civil. Den e sentencia ta mustra tambe riba e hecho cu Jamaloodin ta conoci cu e procedura special, ya cu el a purba haci uso di esey envano.