Diabierna awor creditornan ta dicidi futuro di InselAir

WILLEMSTAD - E destino di e aeroliña InselAir International ta keda dicidi diabierna awor. Durante un reunion di creditornan, lo dicidi si ta extende e periodo di surséance van betaling of no. Segun abogadonan envolvi cu e proceso a splica NoticiaCla, si mayoria di e creditornan dicidi contra esaki, lo mas probable ta cu corte lo declara e compania bancarota y asina ta stop di opera. Si esaki sosode, e acto aki lo afecta Aruba y otro islanan den region tambe.  

MORATORIUM

Tabata un aña pasa e siman aki, dia 25 di augustus 2017 cu corte di prome instancia a extende e moratorium (surséance van betaling) te cu 31 di augustus 2018, cu ta diabierna awor. Durante un reunion diabierna awor den corte na Corsou, e decision pues ta cay si ta prolonga esaki un biaha mas of ta dicidi pa 'pull the plug'. Tin varios version cu ta mustra cu mirando e cifranan, no ta kere ta prudente pa sigui mas cu e compania. Di otro banda, tin informacion cu gobierno ainda por bin cu un sugerencia of un plan di reskate pa evita cu e compania aki por cera su porta. Por corda cu den pasado, gobernantenan actual a bisa cu no por permiti e aeroliña di cera, debi na e impacto economico y social cu e por tin riba e comunidad.

FINANCIERO

E compania no ta pasando door di su miho momentonan, y for di basta tempo ta bringando pa keda cabez riba awa. E compania ruman InselAir Aruba ya caba a perde su bataya, y a keda solamente e ruman grandi esta InselAir International. A purba restructura e compania di tal forma cu e mester por a lanta cabez atrobe. A haci un injeccion financiero y a trece gerentenan nobo cu despues a wordo retira, pero ni asina e situacion no a logra, te cu awor ta teme pa e continuidad di e compania. Pero, diabierna ta mira si e compania ta haya un chens atrobe, of si awor si esaki ta bira e final pa e aeroliña local, cu un tempo tabata e orguyo di Corsou.