St Maarten: Sera negoshinan dialuna merdia pa motibo di tormenta Gonzalo

PHILLIPSBURG – Comerciantenan na St Maarten a wordo avisa pa sera nan negoshi pa 12 di merdia dialuna, relaciona cu preparacion pa yegada di e tormenta tropical Gonzalo. Esaki despues cu un dia prome a avisa cu no tabata necesario pa esaki sosode. Diadomingo ultimo, gobierno a informa cu scolnan so lo tabata sera dialuna, pero comercio y gobierno lo a keda habri.

Pero dialuna mainta e cos a cambia. Departamento di maneho di desaster di St Maarten (DCOMM), a pidi comerciantenan pa sera merdia, pa duna nan trahadonan chens pa por haci e preparacion necesario na nan cas y becindario. Fuera di esey, e ta duna chens na negoshinan tambe pa sigura nan negoshi mes pa e yegada di e tormenta.

Segun ultimo pronostico, ta spera un deterioro di tempo mas den curso di dialuna atardi, mientras cu Gonzalo yega mas serca. E tormenta dialuna mainta 5or, tabata ubica na 165 miya zuid oost di St Maarten y tin forza di 60 miya pa ora. St Maarten hunto cu otro islanan den besindario, ta bou di un ‘tropical storm warning’. Ta spera un total di yobida di 12 inch.

Tabata diadomingo merdia cu a anuncia cu St Maarten, Saba y St Eustatius a wordo poni bou di un asina yama ‘Tropical Storm Warning’, a consecuencia di e trayecto di e tormenta “Gonzalo”. “Consecuencia entre otro di esaki ta cu scolnan lo ta sera na e.o. St Maarten, y residentenan di e islanan menciona ta avisa pa prepara pa completa nan mes pa yegada di e tormenta. Comercio por opera normalmente, pero mester monitoria e situacion di tempo tambe. Gobierno tambe lo opera ‘normalmente’. “. Obviamente e notificacion aki a cambia.