OM: Homber haya morto na Paradera, a muri di overdose di cocaina

ORANJESTAD - E homber cu a wordo haya morto den un auto na Paradera diadomingo, a muri a consecuencia di overdose di cocaina. Asina vocero di ministerio publico Ann Angela a confirma pa NoticiaCla diamars atardi. E autopsia a tuma lugar ayera. 

E CASO

No tabatin señal di violencia riba curpa di homber haya morto den auto na Paradera diadomingo manera e portal aki a raporta anteriormente.. Asina vocero di ministerio publico Ann Angela a bisa dialuna mainta. E curpa ta confisca ainda pa autopsia, aunke cu e indicacion inicial no ta mustra nada di violencia. Ta trata di e caso di e homber cu no tabata duna señal di bida, haya diadomingo den su auto, na altura di un supermercado na Paradera. Inicialmente a bisa cu a haya e homber cu un waya di charge celular, rond di su nek. Tabata mucho tempran ainda asegun Angela, pa bisa si ta trata aki di un caso di asesinato. Pa loke ta e hecho cu a opta pa takel e auto den cual a haya e homber, cu e curpa den dje, tambe Angela a splica. "Esey ta parti di e forma, e cautela y disciplina cu polis forensico-tecnico ta aplica ora di rechercheer" Angela a finalisa bisando.