Prohibicion pa cierto sunblock, ‘foam box’ y ‘single use plastics’

ORANJESTAD - Si tur cos ta bon, entrante 1 di januari 2019, Gobierno tin e intencion pa pone un prohibicion (ban) na uzo di productonan sunblock y/of suntan cu ta contene Oxybenzone, material di foam box y 'single use plastico, manera cups di plastic, y straw. Asina nan a informa parlamento den un carta dia 20 di augustus ultimo.  Oxybenzone ta un di e ingredientenan principal cu ta comproba na e momentonan aki pa ta sumamente dañino pa coral y bida marino. 

DAÑO

‘Como comunidad nos mester por ta consciente di e daño cu ta wordo causa ora cu nos tin gran cantidad di turista anualmente cu ta uza e tipo di cremanan aki. Aruba ta tuma un paso dilanti na e momentonan aki pa tuma un decision den cuadro di proteccion di nos medio ambiente. E decision aki a pasa den Conseho di Minister conhuntamente cu un prohibicion cu ta drenta na vigor desde prome di januari pa loke ta trata tur materialnan di ‘foam box’ y ‘single use plastics’ manera cups di plastic straw etc.

FASE  TRANSITORIO 

Lo duna comunidad 1 aña como ‘overgangsfase’

Esaki ta significa cu ora cu haci e anuncio oficial 1 januari 2019, esaki lo significa cu pa 1 januari 2020 esaki lo ta completamente prohibi akinan na Aruba. E prohibicionnan aki ta particularmente pa garantisa cuido di nos medio ambiente poniendo Aruba riba mapa internacional di ta cumpli cu e deseo cu hopi biaha tin di decisionnan cu mester wordo tuma pa proteha nos medio ambiente.