Jansen: Tur cos ta cla pa e di 8 edicion di Curacao North Sea Jazz

WILLEMSTAD - Tur cos ta cla pa e di 8 edicion di Curacao North Sea Jazz Festival cu ta cuminsa diahuebs awor, 30 di augustus y ta caba 1 di september. Asina miembro di organisacion Bon Intenshon, Sigmund Jansen a confirma pa NoticiaCla diamars. Cu un total di 16 artista reparti riba 3 anochi, Jansen ta mustra cu cos ta mustra hopi bon mes. "Tur hende ta contento cu e festival tey atrobe" Jansen a sigura e portal aki. Bo no ta ripara nada nada cu un aña pasa no tabatin festival. E festival ta ranca sali diahuebs cu e anochi 'gratis' sigui cu e anochinan oficial diabierna y diasabra cu un cartelera di artista renombra internacional cu lo satisface tur hende. Manera nan ta bisa, 'tin algo pa tur hende'. 

INTERES

E hecho cu un aña pasa a opta pa 'skip' e festival, no a impacta esaki den un forma negativo. De hecho, a compronde di Jansen cu e interes ta mucho mas grandi. "KLM y TUI a baha yen yen ayera y tur pasahero a haya un carchi gratis den avion pa diahuebs pa bishita e festival" Jansen a bisa. E porcentahe ta 90% turista y 10% local pa loke ta e publico e aña aki. Hopi hotel ta yen caba, y tin hopi invitado CEO di hotel y aeroliñanan renombra invita tambe. Pa loke ta e buelo di KLM, tabatin 412 pasahero cu a ricibi nan carchi. 

DIAHUEBS

E prome anochi ta esun 'gratis' unda cu e fundacion ta laga e pueblo di Corsou sinti e ambiente di e festival. Pagando un suma simbolico, ta ricibi un carchi pa e festival, pero e artistanan no ta bira di calidad menos. E aña aki, artistanan manera Farruko y Silvestre Dangond, ta poni pa entretene e publico. "Tin hopi hopi interes mes riba e carchinan di diahuebs" Jansen a sigui bisa. 

DIABIERNA Y DIASABRA

E prome anochi 'oficial' ta diabierna cu artistanan manera Sting/Shaggy, Pattie Labelle y Sean Paul como esnan grandi. Riba e anochi ey, fuera di e artistanan aki tin 4 artista grandi mas, manera Kamasi, Jason Derulo, Spyro Gyra y Damian Marley poniendo e cantidad di artista na 7 pa e anochi ey.  E ultimo anochi (diasabra) tin 7 artista tambe, di cual esnan mas popular ta Grace Jones, Carlos Vives, Christina Aguilera y Kc & The Sunshine Band. E otro artistanan pa e anochi ey lo ta Ceelo Green, Michel Camilo Trio, Burt Bacharach. Cada anochi e evento ta cuminsa 7'or y ta caba den careda di 1'or y mei. E set up segun Jansen ta keda mescos mirando su exito, pues lo tin suficiente lugar pa wak concierto, bebe y come y pasa un anochi ameno. NoticiaCla lo ta cubriendo e evento aki tambe.