Serlimar tin 41 miyon florin riba caya di esnan cu no a paga pa recohe sushi

ORANJESTAD - Un cantidad di pregunta mas lo mester haya contesta awe tardi ora cu e reunion publico di Parlamento riba Serlimar continua. Durante e prome tanda dialuna, a trata varios tempa interesante. Entre nan a bin compronde di e mandatario encarga cu e compania, Otmar Oduber (Medio Ambiente) cu Serlimar tin un average di 41 Miyon florin riba caya cu mester wordo cobra di esnan cu no a paga pa recoge sushi entre añanan 2015-2017, desde cu e ley a wordo introduci. Esaki mientras cu durante aña 2018 no a cobra niun hende pa recoge sushi. Un topico cu lo keda discuti sigur diamars. 

PROME PARTI

Durante di e prome parti di e prome tanda den Parlamento, Parlamentarionan a haci pregunta tocante e structura di cobransa cu lo kier introduci pa maneho di desperdicio, ‘tipping fee', actividad tumando luga riba Parkietenbos, pago pa Ecogas, Plan pa e trahadonan despues cu remedia e dump, companianan cu por hiba sushi despues cu recoge esaki y e posibilidad pa otro companianan haci esaki, ‘exclusividad’ di Serlimar pa cobra, e diferente sitionan cu buraco rond Aruba y varios pregunta tambe riba e plan total pa e situacion di sushi aki na Aruba y e ‘budget’ a remediacion di dump Parkietenbos. E reunion ta poni pa continua awe tardi 1:30pm.