Aruba y Corsou lo firma MOU pa desaroya proyecto Fast Ferry

WILLEMSTAD - Aruba y Corsou a acorda di traha den conhunto pa e proyecto di Fast Ferry bira un realidad. Recientemente Minister Chris Romero y Minister Andin Bikker tabata na Corsou pa reuni cu nan coleganan di Gabinete Rhuggenaath, pa asina yega na palabracionnan concreto cu lo sostene e realisacion di e Proyecto Fast Ferry. 

MOU

Durante e reunion a acorda cu lo firma un MoU (Memorandum of Understanding) den poco tempo, unda cu ambos pais ta expresa e intencion pa desaroya e Proyecto Fast Ferry entre Aruba y Corsou. Dicho palabracion a keda ratifica den Conseho di Minister tanto di Gobierno di Aruba y Corsou.

SIGUIENTE PASO

E siguiente paso ta pa cada Gobierno instala un comision multidisciplinario pa atende cu e diferente trabounan di preparacion relaciona cu e Proyecto Fast Ferry. Den un futuro, y ora cu e proyecto yega na un fase mas avansa, lo instala tambe un comision mixto di Aruba y Corsou.