Huez Mericano: Bende accion di CITGO na findishi of pone placa como fianza

WASHINGTON -Un huez federal Mericano a ordena pa bende accionan di CITGO Petroleum na findishi, a lo menos cu Venezuela pone un fianza. Esaki a sosode siman pasa, unda cu e huez federal a ordena pa autoridad Mericano cuminsa e procesa di benta, despues di cu hopi partido interesa a participa den e proceso. Nan ta entre otro propio CITGO y e gigante Ruso di petrolio Rosneft, cu a wordo priminti hopi accion di CITGO como 'borg'. E CEO di CITGO Petroleum, Asdrubal Chavez tabata na Aruba siman pasa, pero a bisa cu otro luna lo duna mas informacion riba e desaroyonan financiero cu ta toca Aruba. Esaki por bira un tema di combersacion tambe otro luna. 

PERDE CONTROL Si Venezuela (PDVSA) perde control di CITGO, expertonan ta bisa cu e por perde un di su unico fuentenan ainda pa placa, esta Merca. Si Venezuela kier mantene control di PDVH, e compania cu ta doño di CITGO, e mester pone un fianza segun e huez. No tabata mucho cla si Venezuela of cualkier di su entidadnan tabata disponibel pa suministra e placa pa e fianza, ya cu e pais ya caba ta den un debe gigante y no por a paga un suma di 6 biyon di dollar na debe, y a haya su mes pa paga e creditornan den otro forma, incluyendo bononan cu e tabatin di reserva. Esey ta un indicacion cu benta di e compania por tuma lugar mas prome cu hopi ta pensa.  

BENTA

E benta di accion ta como parti di e caso recien di e compania Canades di mina Crystallex , cu ta purbando di haya pago di 1.2 biyon dollar den arbitrahe, relaciona cu nacionalisacion Venezolano di propiedad durante presidencia di defunto presidente Venezolano Hugo Chavez.

PROPIEDAD

CITGO ta wordo considera como e propiedad Mericano mas grandi di Venezuela, y accionan di e compania a wordo priminti como borg na doñonan di bono den e compania petrolera. Te cu awor, e doñonan aki ta e unico creditornan cu a wordo paga durante e crisis.