Diaranson ta fiha proximo paso di Comision Accion Nacional

ORANJESTAD – E reunion nacional di diaranson awor cu Comision Accion Nacional a convoca diadomingo, tin cu fiha e proximo paso di e comision, segun su lider Hendrik Tevreden a bisa NoticiaCla.com dialuna mainta. E reunion mes ta programa pa tuma lugar diaranson anochi na Tanki Leendert y ta habri pa tur hende cu forma parti di e comision.

Despues cu gobierno a notifica CAN diahuebs cu no ta reduci e tarifa di coriente, CAN a reuni henter fin di siman riba e contesta cu nan a ricibi. “Nos a studia e documento, rapport y contestanan ricibi di gobierno” Tevreden a sigui bisa. Ta na e reunionnan ey a dicidi diadomingo cu ta convoca e reunion nacional aki. “Den e reunion aki a invita tur gremio sindical, comercial, organisacionnan politico y pueblo di Aruba en general”. Segun Tevreden, lo trata entre otro e ultimo manifestacion, manifiesto entrega, reunion y contesta di gobierno. “Y mas importante e ultimo tin di ser fiha hunto paso nos forsa ta den union”.

Tabata diahuebs merdia siman pasa cu gobierno a contesta CAN, cu tanten cu e handling fee di Valero no baha, no por reduci e tarifa di coriente. Despues di e reunion cu gobierno siman pasa, dialuna ultimo CAN a duna gobierno ultimatum te diaranson ultimo, cu despues a keda prolonga te diabierna ultimo. Minister Otmar Oduber a confirma na NoticiaCla.com diabierna mainta cu for di diahuebs a cumpli cu e ultimatum (aunke gobierno inicialmente no tabata na altura di ningun ultimatum).

E contesta pues no tabata positivo mirando cu a bisa cu e contesta principal, ta cu no por cumpli cu e peticion di revoca e aumento di tarifa di coriente manera pidi. Hunto cu e contesta, a manda un cantidad di documento di tanto Elmar y WEB pa por hustifica e contesta cu nan a duna. “Tanten cu e handling fee di Valero ta existi, e prijs dificilmente lo por varia di loke e ta aworaki conforme ahustacion haci” Oduber a bisa. Mes momento sinembargo, gobierno a manda un carta pa Valero, cu combersacionnan lo continua pa wak si por reduci of elimina e handling fee mas cu ta posibel. Na momento cu esey tuma lugar, lo ahusta e tarifa di coriente” Oduber. Awor ta keda na CAN pa wak kico ta nan siguiente paso. Segun Oduber, no ta na altura cu nan tin cu bin bek na otro.

Comision Accion Nacional a protesta dos siman pasa den un forma di manifestacion, cu e meta pa pidi gobierno e.o. pa kita e aumento di tarifa di coriente. Na final a entrega un manifiesto, cu e peticion aki. A reuni despues cu gobierno y a keda di bin bek pa duna un contesta final. E contesta final pues ta cu, tanten e handling fee di Valero keda manera cu e ta, no tin reduccion di tarifa di coriente. E foto archivo ta di 1 di october ora cu Comision Accion Nacional ta entregando e manifiesto na gobernantenan.